Iran mitkartemi drone tasen ka sayaogo

Tehran, October 26 (Agencies): Iran’er Revolutionary Guards (RG) mitkartemi pasasa poksatetba aser ali o tzüyim naprong nung pokshitsü osettsüset pokdakja arrür amaktsü akokba aser nisung memeni yimdaktsüba drone tasen ka tanü, Bodbar nü sayaogo.
“Tan sayaba drone tayimtsü ya tzüyim nung itangittsü maparen inyakdaktsütsü nükjidong nung yanglu. Iba drone tasenba nung tongpang nung amshitsü missile memesenloktettsüsa yanglu saka iba drone-i pasasa poksa, arrürtem alidak pokshitsü lendong atalokdaktsütettsüsa pokshitsü osettüset taret mesenloktettsüsa yangluogo,” ta RG ketdangsertemi metetdaktsü.
Tan sayaba drone tayimtsüi tzüyim anasa kanga kara yima or arrür rongtem dak tsükoka, pokshitsü oset pokdaktsüba ajanga lendong tulu atalokdaktsütettsüsa yangluba osanga jangjaogo.
“Drone tasenbai tzüyim nungi feet 2 pilar ghonda nung kilometer 250 tashi kara  yimzütetba den iba drone-i ali nungi feet 3,000 tonga anünglena yimzüteter,” ta Iran sorkari ketdang asüba Tasnim news agency-ia metetdaktsü.
“Drone tayimtsüi aonung aser anüngdang naprong tetsükdaktsü kecha majurui yimzüdaktsütsü atema drone tayimtsü nung mitkar camera tajung mesenloka lir,” ta kasa osang ajanga ashi.
Taoba mapang inyakba ama, Iran mitkartemi tan sayaba drone tayimtsü noksa alima dang sayuogo saka kasaji anüng nung yimzüba noksabo mesayui lir.
2011 küm December ita tashiyim agi bena arutetba US sorkar kübok Central Intelligence Agency (CIA)-i ketdang asüba RQ-170 Sentinel drone ka nungi shisatsü ngua, amaktsü mapatong balala nung amshitetba Saegheh drone takok ngua yangluba osang ka RG-i tan October ita tetenzüklena metetdaktsü saka parnoki kasaji anüng yimzüba noksabo kuli asütsüsa alima dang mesayutetoi liasü.
Par cyber tongpang rarar ketdangsertemi US drone tayimtsüji tashiyim agi bena aru ta RG ketdangsertemi osang metetdaktsü saka technical timtem ajuruba ajanga par RQ-170 Sentinel drone Iran lushi nung tsükok ta CIA-i osang jangjashija liasü.