Iran nuclear program atema tenangzüktep agiogo

Vienna, July 14 (Agencies) : Ita 20 tashi olemtepyonga aruba sülen Mongulbarnü Iran linük indang nuclear programme atema tenangzüktep agitetogo.

Iba onük ya U.S. Tir, Barack Obama’er foreign policy nung kanga dang tongtipang onük ka lir aser tanü telemtetba agiba ajanga Iran aser West tsüngda tesentaktep tajungba akümtsü amai ajiteter. Ano iba ajanga Middle East nung tajangzük tulu bener arutsütsü akok.

Iba olemtep nung adener – Britain, China, France, Germany, Russia, the United States, Iran linüktem den European Union nunger 18 tashi tatembangba senden agia aruba sülen Mongulbarnü Vienna yimti nung telemtetbaji agiogo.

Mongulbarnü Obama-i iba telemtetba agiba atema tenüngsang agütsüogo aser pai ashiba ama tenangzüktep agitetogo ta paisa shisem.

“Küm ana jembitepa aruba sülen tanü United States-i alima den külemi küm aika nung mokoktetba ka tongtetba atema pelar,” ta tanü White House nungi Obama-i Vice President, Joe Biden den külemi osangbener senden nung ashi.

“Iba tenangzüktep ya tamang nung masü saka jangjatepba ajanga agiogo” ta paisa shisem.

Iran Tir, Hassan Rouhani-ia iba tenangzüktep agiba atema tenüngsang agütsüogo.

“Olemtepertemi tenangzüktep tajung ka agiogo aser asenok sarasadem asangsang nung atalokogo ta ni asen sensosangertem dang ashir” ta Rouhani-ia metetdaktsü.

Iran-i nuclear maparen inyakba nung tazüokba kar alitsü nangzükba ajanga parnok linük aika nungi tenokdangba ngua aliba agientsü. Ajisüaka, Iran indang atomic program ji mapa tajung atemabo maneni inyaka otettsü.

Iba osang angazükba sülen International Atomic Energy Agency tanishir, Yukiya Amano-i ashiba agi, pai Iran sorkar den par linük indang nuclear program atema telemtetba kar agitepogo.

Tanü tenangzüktep agiba nung Iran-i tongtipang nuclear mapa inyakba tesemtem nung enrichment mapa meinyaktsü aser Natanz facility nung dang uranium research aser development mapa inyaktsü.

Iran-i teti atema spent fuel linük adena bener aotsü aser IAEA inspector tem nem tendangtsü atema temelaba agütsütsü,

Mongulbarnü Vienna nung iba senden magidang Iran Foreign Minister, Mohammad Javad Zarif-ia, iba telemtetba ya otsüsütsüsa lir, ta ashi.

Senden tembangba sülen, U.S. Secretary of State, John Kerry-i, Iran nuclear tenangzüktepji tanep agi aser iba ya yimjung atema mera ka aoba lir aser rara nungi mera ka atsünga aluba lir ta ashi.

“Tir Obama-i iba mapa tasü itta tenzük, tamang ayu, pusema nungit aser ajungshiba ajanga takok ngutetogo” ta Kerry-isa shisem.

Iran-i joko kodanga nuclear weapons yanglutsü atema mapa meinyaktsü mesüra malizüktsü, ta EU foreign policy tanishir, Federica Mogherini-ia metetdaktsü.

Iran indang nuclear programme atema olemteper züngsem 8 rongnung Britain, China, France, Germany, Russia, United States, Iran aser European Union nungertem lir.