Iran nung British embassy tanaben lapokshitsü

London, August 21 (Agencies): Taoba küm 4 tashi shibanga ayuba sülen Britain-i par embassy ki Iran yimtiba, Tehran nung tanaben lapokshitsü renemogo.

Britain Foreign Secretary, Philip Hammond-i Tehran nung par embassy kiji tan Deobar nü lapoktsütsütsü asoshi sentong renema lir ta Guardian osangi tanü Hokolbar nü metetdaktsü.

Kasa anogo nung London nunga Iran embassy ki tanaben lapokshitsü sentong renemogo ta osangisa ashi.

Hammond-i tan Tehran semdangtsü renemba ya küm 12 tsüngda nung Britain foreign secretary kati tan mezüngsüa Iran semdangtsü sentong atonger lir.

Aji oda, alima tashi abenba linük lenirtem o Iran nati nuclear tezüngzüktep takok ngua agiba sülen, France aser Italy foreign minister, Germany vice chancellor aser European Union (EU)’er foreign policy lenila nunger sülen anidaka, Hammond-i tan Iran semdangtsü renemer lir.

Tehran nung embassy ki lapokba sentong nung Britain nung alir shishilembar lenritem aser par Foreign Office nung political director, Simon Gass nungeri Hammond den külemi shilem agitsü renemba osanga jangjaogo.

Britain-i Iran anema tenokdangba sentong benokba agi jashidaktsüba Iran nübur telok kati taoba mapang, November, 2011 nung Britain embassy ki amakba sülen Britain-i Tehran nung tentetba embassy ki shibanga liasü.