Iran nung Hassan Rouhani-i tanaben Tir inyaktsü

Tehran, May 20 (Agencies): Iran President Hassan Rouhani-i Honibarnü re-election nung takok tulu nguogo. Rouhani-i alima den tesentaktep yanglutsü merangba aser rongsenkettsüng jenjang ajungkettsü merangba atema nübortemi pa nem vote agütsüogo.
Arishi küm 68 tain Rouhani-i tashitait linüktem den 2015 nuclear tenangzüktep agiba maparen ketdangsüa inyak. Re-election nung pai 23.5 million votes angu aser ibaji noklang nung shilem 57 shi lir. Pa den tokteper Ebrahim Raisi-i vote million 15.8 (38.3%) angu.
Iran-i alima den tesentaktep yanglutsü merangba nung tetsükdaktsü ka ajuruogo aser ibaji US President Donald Trump-i nuclear tenangzüktep agientsü ta amokmerenba lir. Tang Trump-i Iran den toktepba linük Saudi Arabia semdanger.
Yashi re-election agidang ketdangsertemi vote agütsüba mapang ghonda aika atsülangtsüsa aküm, kechiyong tesüiba küm 20 tsüngda voters list nung nisung million 20 shi bendenloka liasü.
“Yasüng nungi onoki takok tulu angutsü ta bilema liasü aser ibaji asangdang nung atalokogo” ta Iranian Privatisation Organisation adviser Farid Dehdilani-i ashi. Pa ya Rouhani’er election nüboyimba nung shilem agia liasü.
“Ozü nübortemi President Rouhani dak temulung alemba nangzüksshiogo aser alima den tesentaktep yanglutsü merangba pusema nungiter ta parnoki sayuogo” ta Farid-isa shisem.
Syrian rara nung Iran den yariteper Russia President Vladimir Putin aser EU foreign policy tanishir Federica Mogherini nati Rouhani nem tenüngsang agütsü.