Iran nung tamanger ana, tetsü aser lar jabaso na pua lir

March 09, 2017 : Iran Revolutionary Guard temi Iran nunger tamanger ana pua lir aser ibaji ajanga Muslim amangertem timba aliba tesem nung amangbapur rishikangshiba ano manen lir ta jangja sayur.
Iran nung aliba Human Rights Centre-i ashiba agi, Anoohe Rezabakhsh den lar jabaso Sohail Zargarzadeh na par kidang nungi pua bener ao.
Tetsü aser jabaso na ya Islam amanger liasü ajisüaka Catholic yimsü agizük.
Alliance of Iranian Churches atema otongdar Mansour Borji-i, “Islamic Revolutionary Guards Corps (IRGC) nungi Intelligence agent nisung ana Oroumiyeh yimti nung tamangba yimsü agizüker aliba Anoohe Rezabakhsh aser lar jabaso Sohail (Augustin) Zargarzadeh na kidangi osang kecha memetetdaktsüi arua lar kidang bushisüngdang asü aser kidang jabaso tena indang Laishiba aser tamangba osettem dena bener ao,” ta ashi.
Iran nung tamanger telok ya küm meyirjang aika tain lir. Tamanger telok tulutibaji Armenia nunger lir, saka ano Assyria nunger telok tilaa ka lir aser Pentecost yimsü nung amangertem den ano yimsü balala nung amangertema kar lir.
Linük nung nisung kwi tamangertem lir ibaji mejangjateter kechiba süra yangji aliba Muslim telok tulutiba, Shia-i nütsüng agi tangar memenepertem pei amangnüba tamangba yimsü amangdaktsür ta ashir, ajisüaka parnok linük nung tamangertem aser Zoroaster tamangba yimsü amangertem rishikangshir aser Islam dangi meyipdaktsür.
Tamangertem rishikangshiba anema nokdakertem telok, Open Doors-i amangbapur rishikangshiba linük tamajungtiba tarensen nung Iran-i 8buba nung lir, ta metetdaktsüogo.