Iran nung tayimtsü ka tsükok; nisung 15 asü

Tehran, Aenjeti/January 14 (Agencies): Kyrgyzstan nungi aruba Iran nunger Boeing 707 cargo plane, Hombarnü Iran yimtiba anüolen anentsü merangba mapang tsükoka iba lendong nung nisung 15 asü, ta Army sangdong ka ajanga Hombarnü metetdaktsü.
Iba osang magütsü tsüngda Fars news agency-i tayimtsü nung mena alir parnok 16 rongnung ka dang kümzük, ta sangdonga liasü.
Tayimtsü ya runway adena ajua or Fath Airport anasa aliba ki tem dak oa atsük aser iba sülen mi adoka arong. Iran state media ajanga sayuba noksa nung tayimtsü teben ronger aliba den ki ronger aliba sayuogo.
Iba tayimtsü ya Fath Airport nung tsükok, koba Iran paramilitary Revolutionary Guard meyong lir. Tayimtsü ya Tehran nungi km 40 shi pilar aliba Payam International Airport nung anentsü liasü.
Ketdangsertemi, iba tayimtsü kechiba iba airport nung anentsü asoshi telemtetba agi, iba indang osang tejangja magütsü, saka tayimtsü maneni tsüngda tayimtsü nung mena aliba crew-i jungdak mapa ka aliba indang metetdakja liasü.
Iran emergency medical services tekolakba Pirhossein Koulivand-i ashiba agi, tayimtsü nung mena alir parnok 16 rongnungi flight engineer ka dang kümzük.
Iba tayimtsü nung Kyrgyzstan yimtiba Bishkek nungi Iran-i shi bener arua liasü. Iran’s air force-i, tayimtsü tsükokba tang bushisüngdang südar ta metetdaktsüogo. Tayimtsü ya shiba indangar mejangja saka army otongdar Gen. Shahin Taghikhani-i state TV dang ashiba agi, tayimtsü nung mena alirtem ya Iran nunger liasü.
Iba keno bushisüngdangertemi tayimtsü indang black box ngutetogo aser iba ajanga tayimtsü tsükokba osang tejangjaba agütsütsü, ta deputy Alborz governor Azizollah Shahbazi-i Tasnim news agency dang ashi.