Iran o Saudi nati sentaktepshitsü ajungshir: Ban

Muscat, February 01 (Agencies): Saudi Arabia aser Iran linük nati par mangatettepbaren benteta tanaben sentaktepshitsü tajungshiba olen ka United Nations (UN) Secretary General, Ban Ki-moon-i tanü, Hombar nü metetdaktsüogo.

Ban-i tanü Oman semdanga Oman’er National Defense College nung onük jembidang iba tajungshiba olenji metetdaktsü.

“Saudi aser Iran nati par mangatettepbaren benteta tanaben sentaktepshiba ajanga Middle East ajunga nung tensa tajungba akümtsü,” ta Ban-i ashi.

“Alima tashi abenba linük lenirtem den nuclear tezüngzüktep agiba melena tenokdangba sentongtem agienba ajanga Iran-i par Middle East nung tensa tajungba kümdaktsütsü maparen nung tongti shilem agitsü imlar,” ta pai lemsatep.

Ban-i tan Oman semdangdang Oman lenirtem dena ajurutepa senden ka amenba osang jangjaogo.

Saudi sorkari tongti Shiite kin putir ka taoba January ita tetenzüklen tepseta merenshiba atema jashia Iran nung longkak aiter telok kati Tehran nung tentetba Saudi embassy ki amak aser ibaji ajanga par linük ana tsüngda tang tesendaktep kanga mejungi kümogo.

Ano külen, Syria nung tongpang rarartemi tongpang raradang ozüng alema aser nübur nem agütsüba temeten anema inyakba atema taochi mesayutsü tajungshiba olen ka Ban-isa metetdaktsüogo.

2011 küm nungi tenzüka Syria Tir, Bashar al-Assad-i aniba Syria sorkar aser sorkar anemer na tsüngda mangatettep tulu adokba tongpang raraba ajanga nisung 260,000 dak tema tepsetba osang bushiteta lir.

Aji oda, Syria nung tensa tajungba kümdaktsütsü nükjidong nung UN-i ayonger Switzerland kübok Geneva yimti nung taoba hopta nungi tenzüka Syria yimjung senden amen tenzüka lir.