Iran Parliament-i West den agiba nuclear tezüngzüktep agizüker

Tehran, October 13 (Agencies): Iran parliamenti anogo ishika o lemtepa senden amenba sülen par linük aser alima tashi abenba linüktem na tsüngda taküm 2015 küm tumlen agiba nuclear tezüngzüktep agizüktsü telemtetba ka tanü Mongolbar nü agiogo.

Tan agiba telemtetba sentong nung Iran parliament züngsem 161-i nuclear tezüngzüktepji agizüktsü aser 59-i magizüktsü vote agütsüba aser 13-i shilem magiba osang jangjaogo ta Iran sorkari ketdang asüba IRNA osangi metetdaktsü.

United States linük nunga par linüki iba nuclear tezüngzüktep agizüktsü mesüra magizüktsü o lemtepbaren ita ka tejaklen agia liasü aser US Congress nung züngsemba Democrat yimsüsürtemi Republican yimsüsürtem madak takok ngua kasaji agizüktsü lemtetba osang jangjaogo.

Küm aika benoka jembitepa arur külen, US, Britain, China, France aser Russia den külemi, Germany densema P+1 ta ajaba alima tashi abenba linüktem aser Iran nati taküm July ita nungtugu iba nuclear tezüngzüktep tembanga agi.

Iba tezüngzüktepji agiba sülen, Iran-i par nuclear osettsüset yangluba maparen taruba küm 10 tashi anentsü nangzükba melena alima tashi abenba linüktemia Tehran anema benokba tenokdangba sentongtem agientsü renem.

Iran-i tongpang nung amshitsü nuclear osettsüset yanglur ta par linük dak temulung melemteti arur külen kasaji anentsütsü nükjidong nung alima tashi abenba linüktemi Iran den nuclear tezüngzüktepji agiba osang bushitetogo.

Ajisüaka, tongpang nung amshitsü osettsüset masü saka medical research aser power generation amala nübur taküm jenjang tajungba kümdaktsütsü nükjidong nung par nuclear sentongji tenzük ta shia, Iran-i par maparen metendaktsüba olen metetdakja lir.