Iran, Russia, Turkey-i UN ketdangser ajurutsü

United Nations, Luchii/December 15 (Agencies): Syria atema United Nations Special Envoy Staffan de Mistura-i, Iran, Russia aser Turkey nungi tongtibang ketdangsertem den Geneva nung taruba hopta tetenzüklen constitutional committee ka tentettsü asoshi ajuruteptsü, ta UN sangdong ka ajanga metetdaktsü.
Syria atema constitution tasen ka draft asütsü aser election agiba nung teyari agütsütsü atema committee ka tentettsü asoshi asadanga aliba ya Mistura-i ita shia UN Security Council nem osang agütsüba matong tsüngda akatsü, ta kasa sangdong ajanga Rogonü metetdaktsü.
Taoba hopta Syria nunger telok tem aser parnok yongtsü nung inyakertem tsüngda Kazakhstan nung constitutional committee ka tentettsü asoshi ajurutepa liasü, saka telemtetba ka magitet, koba küm tenet tashi raraa aruba anendaktsütsü asoshi tongtibang inyakyim ka liasü. De Mistura indang term taküm küm tembangtsü aser pai ashiba agi, iba senden nung telemtetba ka magitetba ya maongka tajung ka süitemba lir.
Aenjeti/Jan Russian kübok Sochi nung senden akaba mapang densemba linüktemi de Mistura nem Syria nunger mongintem, lokti tentet balala, independents, tribal lenir aser tetsürtem parnok 50-i kümtetba telok ka tentettsü asoshi temelaba agütsü.
Syria tir Bashar al-Assad-i, par sorkari tang aliba constitution yanglushitsü asoshi dang bilemdangtsü ta ashi koba Sochi nung mulungtepba dang nungi balaka lir, kong sorkar opposition aser independent-i document tasen ka draft asütsü agizüka liasü.
Syria rara nung nisung 36,000 dak tema tepsetogo, koba 2011 küm sorkar anema nokdakertem police temi nokdangba nungi tenzük.