Iran sülen Islamic State-i Saudi Arabia amokmerener

Dubai, June 10 (Agencies): Iran yimtiba Tehran nung nisung 17 tepsetba atema tenüng agiba sülen Islamic State (IS)-i Saudi Arabia amaktsü ta amokmerena metetdaktsüogo, ta Site Intelligence monitoring group-i ashi.
Bodbarnü Tehran nung suicide bomber aser prangpong amertemi Iranian parliament aser Ayatollah Khomeini indang mausoleum amak. Iba lendong nung nisung aika yirua lir.
Shi’ite pur teimba sür aliba Iran nung IS-i maneni amaktsü ta amokmerenogo.
Tehran mamakdang yangluba asütsü akok ta bilemba video ka nung, kiralongrar pungu tejak meimbanger Iran nung Shi’ite nunger amokmerena lir aser iba video nungsa Saudi Arabia sorkar dang parnok mapanga arutsü ta shia lir.
“Allah-i mulungra, iba brigade ya Iran nung mezüngbuba jihad asütsü aser onoki Muslim nunger dang onok sülen anidaktsü ayongzüker. Allah-i mulungra, mi jangrua alibaji meseptettsü” ta tejak meibanger aliba nisung kati video nung shia lir.
Video tatemlen paisa Saudi Arabia sorkar dang, “Iran sülen, nür mapang-a arutsü. Allah ajanga onoki nü kiojenten amaktsü. Onok shinga indang agent masü. Onoki ‘Allah aser His Messenger’ akhümtsübur aser tamangba yimsü atema rarar. Iran mesüra Arabian Peninsula atema masü saka tamangba yimsü atema rarar” ta shia lir.
Islamic State(IS)-i Syria aser Iraq nung tesem aika makdoka agia lir aser parnoki taoba mapanga Saudi security forces den Shi’ite nunger makogo.
Iran ketdangsertemi ashiba agi, amakertem rongnung par pungubo Iran nunger senso liasü aser parnokji IS-i aniokba liasü.
Külen, Iran nung tashitait Revolutionary Guards Corps-ibo amakbaji Saudi Arabia dak tai tongloktsüogo aser mang ayangtsü ta metetdaktsü. Ajisüaka, Sunni nunger teimba aliba Saudi Arabia-ibo parnok shilem kecha mali ta ashir.
Saudi Arabia, Egypt, United Arab Emirates aser Bahrain linüktemi Qatar den tesentaktep pilaba sülen tang Middle East nung tensa mejungi küma lir.
Qatar-i kiralongraba pusema yarir ta linük pezüi tai tongloktsür saka Qatar-i ibaji magizüker.
Hokolbarnü Saudi Arabia nung U.S. embassy-i U.S sensotem dang security notice ka agütsüogo.