Iran Tir, Rouhani-i Europe semdangtsü mapatong tenzüker

Rome, January 25 (Agencies): Iran Tir, Hassan Rouhani-i Italy yimtiba, Rome tanü Hombar nü tonga aoba osang jangjaogo.

“Tir Rouhani-i anogo 4 agia Europe semdangtsü mapatong tenzüka tanü Rome yimti tonga ogo,” ta par ketdangsertemi metetdaktsü.

Tongpang nung amshitsü nuclear osettsüset yangluba ken o nung ajemdaker alima tashi abenba linüktemi tenokdangba sentong benokba yong Rouhani-i tan Europe semdangba ya Iran Tir kati küm 16 shi nung tan mezüngsüa Europe semdanger lir.

Rouhani-i tan agiba semdangtsü mapatong ya yaküm 2015 küm agitsü sentong renema liasü saka kiralongrartemi France yimtiba, Paris nung yaküm November ita lendong kanga sashia atalokdaktsüba yong pai iba sentongji thinentsüsa aküm.

Aji oda, minister aser tongti shishilembar nisung 120 shi anisang, Rouhani-i tanü Rome tonga aoba sülen Italy Tir, Sergio Matterella aser Italy Ato Kilonser, Matteo Renzi na den ajurutepa senden amenba den külemi, Catholic tamangba yimsü lenisang, Pope Francis dena Vatican nung ajurutepba osang jangjaogo.

Rouhani-i tan Rome semdangdang par linük ana tsüngda dollar sen billion 18.4 jenjang aketba tezüngzüktep ishika agitsü alizüng yua lir.

Anogo 2 agia Italy semdangba sülen Rouhani-i tan Bodbar nü France semdanga France Tir, Francois Hollande dena ajuruteptsü sentong renema lir.

You must be logged in to post a comment Login