Iran Tir, Rouhani-i January nung Vatican semdangtsü

Vatican City, December 22 (Agencies): Iran Tir, Hassan Rouhani-i sangküm 2016 küm January ita Vatican semdanga Catholic tamangba yimsü lenisang, Pope Francis den ajuruteptsü sentong renemba osang ka Vatican otongdar, Ciro Benedettini-i tanü Mongolbar nü metetdaktsüogo.

“Tir Rouhani-i sangküm 2016 küm Janurary ita tatemlen Vatican semdangtsü sentong renemogo. Ajisüaka, Vatican semdangtsü anogo tanü tashi lateta mali,” ta pai osang jangjashitsü.

2013 küm nungi tenzüka Iran Tir menden abensang, Rouhani-i tan mezüngsüa Vatican semdanger akümtsü lir.

Italy aser France na semdangtsü den sentaktepa Rouhani-i taoba November ita Vatican semdangtsü sentong renem saka kiralongrartemi Paris nung lendong atalokdaktsüba yong pai iba sentongji agientsüsa aküm.

Taoba mapang, 1999 nung Mohammad Khatami-i Vatican semdanga John Paul II den ajurutepba sülenbo Rouhani ya Vatican semdanger mezüngbuba Iran Tir akümtsü.