Iran Tir, Rouhani-i Pakistan semdangtsü sentong renemer

Islamabad, March 10 (Agencies): Iran Tir, Hassan Rouhani-i Pakistan linük tan March ita tatemlen semdanga par linük ana tsüngda rongsenren tesendaktep tajungba küma yanglushitsü sentong renemba osang ka par ketdangsertemi tanü, Brehostibar nü metetdaktsüogo.

Rouhani-i tan March ita 25-26 nü agia Islamabad semdangtsü sentong renemba osang angazükogo ta Dawn online osangi metetdaktsü.

Rouhani-i tan Pakistan semdangtsü renemba ya Iran Tir kati küm 4 tsüngda nung tan mezüngsüa Pakistan semdanger alitsü.

Pakistan aser Afghanistan lenirtemi aroki amenba senden nung shilem agitsü asoshi taoba Iran Tir, Mahmoud Ahmadinejad-i 2012 küm February ita Islamabad semdangba sülenbo Iran Tir-i tanü tashi Pakistan mesemdangi lir.

Alima tashi abenba linük lenirtem den nuclear tezüngzüktep agia par Iran linük anema benokba tenokdangba sentongtem agienba sülen Tir Rouhani-i bendang linük ishika semdanga rongsenren tesendaktep tajungba küma yanglushiba osang bushiteta lir.

United Nations (UN)-i Iran anema benokba tenokdangbaren agientsü asoshi Pakistan-ia taoba February ita lemtetba ajanga par linük ana tsüngda rongsenren aser shishilembatsü tezüngzüktep sadema agitsüsa lenmang lapoktsüogo.

Saudi Arabia sorkari Shia kin putir ka, Sheikh Nimr taküm küm tentenzüklen tepseta merenshiba sülen Iran aser Saudi na tsüngda tesendaktep mejungi akümbaren agientsütsü nükjidong nung Pakistan Ato Kilonser, Nawaz Sharif-ia taküm January ita Tehran semdanga liasü.

Ano külen, par mitkartemi tawa missile tendanga kadokba ajanga par Iran linüki UN telemtetbaren anema meinyakba olen ka Iran foreign ministry-ia tanü metetdaktsüogo.

“Ozü mitkartemi tawa missile tendanga kadokba ajanga JCPOA mesüra UN Security Council (UNSC)-i agiba telemtetba anema meinyak,” ta Iran foreign ministry otongdar, Hossein Jaber Ansari-i tanü sangoktsü.

“Ozü Iran-i tawa tendanga kadokba missile ajunga nuclear tongpang oset abenba missile masü saka ozü linük kümzüka ayutsü tongpang oset dang lir,” ta shia, par linüki UNSC-i agiba 1929 buba telemtetba anema meinyak ta pai osang jangjashitsü.

1929 buba UNSC telemtetba kübok Iran linüki tongpang nung amshitsü nuclear osettsüset bentetba ballistic missile tendanga mekadoktsü asoshi lateta lir.

“Iran-i par ballistic missile tendanga kadokba ajanga par mitkartemi JCPOA aser UNSC telemtetba anema inyaker,” ta shia, US densemba West-i Iran aija lir.