Iran Tir, Rouhani Paris-i jaokogo: Fabius

Tehran, July 29 (Agencies): France yimtiba, Paris taküm November ita semdangtsü asoshi Iran Tir, Hassan Rouhani jaokba olen ka tang Iran semdanga alisang, France Foreign Minister, Laurent Fabius-i tanü Bodbar nü metetdaktsüogo.

“Ozü Tir, Francois Hollande-i Iran lenisang, Rouhani Paris yimti taküm November ita semdangtsü jaokba shiti ka ni tanü tongtsüogo,” ta Fabius-i tanü Tehran yimtiba tonga aoba sülen metetdaktsü.

Par France densema alima tashi abenba linüktemi Iran den nuclear tezüngzüktep agir hopta ana süir külen, Fabius-i par France o Iran na tsüngda tesendaktep junga yanglutsü nükjidong nung tan Iran semdanger lir.

Fabius-i tanü Tehran tonga aoba sülen Iran Foreign Minister, Mohammad Javad Zarif den ajurutepa par linük anati külemi lungjemer Islamic State (IS) ta ajaba kiralongrar telok anema raratsü aser par linük ana tsüngda shishilembateptsü onük benoka liasü.

“Iran Tir, Rouhani-i alima tashi abenba linük lenirtem den nuclear tezüngzüktep agiba atema pa dang pelaba lemsateper,” ta Fabius-i metetdaktsü.

Paisa ashiba agi, ajaki agizüktettsü nuclear tezüngzüktep agitsü nükjidong nung alima tashi abenba linük lenirtemi benokba takhangbaren agientsü memulungi liasü.

Ajisüaka, nuclear tezüngzüktep takok ngua agiba ajanga Iran-i alima ajunga den tesendaktep tajungba yua nungdakba terenlok tetsükdakba kecha majurui agitettsü ta pai ashi.

“France den külemi amaliteper IS telok anema raraba den külemi, par linük den shishilembateptsü mulunga lir,” ta Zarif-ia tanü metetdaktsü.

Fabius jakdang European Union (EU) foreign policy lenila, Federica Mogherini aser Germany vice chancellor, Sigmar Gabriel natia Tehran semdangba osang jangjaogo.