Iran: Train tsüktepba lendong nung 36 tsükset, 95 shi yiru

Iran yimtiba, Tehran nungi anüdokleni kilometer 400 shi pilar, Semnan province kübok Shahroud yimti tezülen train ana tsüktepa lendong atalokba sülen nüburtem lendong atalokdak sentepa aliba noksa ka video nungi agizükba yangi angur. (Shahroud, November 25)

Tehran, November 25 (Agencies): Iran kübok Shahroud yimti anasa nüburtem anir senzüba train ana tsüktepa, tanü Hokolbar nü lendong tesashi ka atalokba osang ka Iran sorkar ketdangsertemi metetdaktsüogo.
“Tehran yimtiba nungi anüdokleni kilometer 400 shi pilar, Shahroud anasa atalokba lendong nung nisung 36 shi tsüksetba aser nisung 95 shi yiruba osang jangjaogo. Ajisüaka, tan lendong nung nisung tsükseta yiruba osangji tang jangjaba dang nungi timba akümtsü akok,” ta Iran’er Red Cresent otongdar, Mostafa Mortazavi-i osang jangjashitsü.
Tan lendong atalokba sülen train nung mi temloka arongba aser firefighter ketdangsertemi miji remseptsü atema kanga meranga inyakba osang ka Semnan provincial governor, Mohammad Rez Khabbaz-ia metetdaktsü.
Paisa ashiba agi, tan lendong ajuruba train anati nisung kwi anir liasü iba osang tang tashi mejangjateti lir saka rescue ketdangsertemi tan lendong ajurur nisung 100 shi taküm kümzüka anitetogo.
Shahroud yimti tezülen tentetba Haft-Khan station tonga aoba train kati station nung anena aliba train ka dak tsükokja, tan lendongji atalokba osang jangjaogo.
Ajisüaka, kechi timtem ajanga tan lendongji atalok iba osangbo tang tashi mejangjateti lir.