Iran: Zebari Finance minister menden nungi anentsüogo

Baghdad, September 21 (Agencies): Iraq parliament-i par yimsüsür, Hoshiyar Zebari Iraq finance minister menden nungi tanü, Bodbar nü anentsüogo.
Zebari-i ochimeshi inyakba ken o nung ajemdaker parliament-i tan pa yimsüsütsü menden nungi anentsür lir.
Sorkar senpong nungi sen agizüka kasaji ochimeshi amshiba ken o nung ajemdaker pa den tasüngdangba sentong taoba August ita agiba sülen Parliament yimsüsür 235 nungi parnok 158 tashi par vote agüja Zebari yimsüsütsü menden nungi anentsü.
Taoba mapang Iraq foreign minister menden abensang, Zebari-i tawa International Monetary Fund (IMF) lenirtem den ajurutepa par Iraq nem sen aputsütsü onük benokba osang jangjaogo.
2014 küm nungi tenzüka, Islamic State (IS) kiralongrartemi Iraq lushi shilem 4 nung shilem 3 shi tashiyim agi agiba ajanga alima dang totzü ayokba ajanga rongsen aazükba linük, Iraq-i tang rongsenren jenjang tamajung ajurutsü tenzüka lir.
“Ozü linüki rongsenren jenjang tamajung ajuruba mapang ka nung Zebari finance minister menden nungi anentsüogo. Ajisüaka, Zebari yimsüsütsü menden nungi anentsüba ajanga IMF aser Iraq  sorkar na tsüngda tesendaktep mejungi akümtsü akok,” ta Parliament’er finance committee züngsem, Sarhan Ahmed-ia metetdaktsü.
“Zebari finance minister menden nungi anentsüba ajanga ozü Iraq-i ozü linük indang rongsenren aser yimtenren jenjang junga lir ta IMF dang mesayutettsüsa kümogo,” ta pai shisem.