Irani-i Parliament nung yazü jembiogo: Rohith’er kinünger

New Delhi, February 26 (Agencies): Hyderabad University nung soseta asüsang, PhD kaketshir Rohith Vemula’er kinüngertemi Hokolbarnü, Union HRD Minister, Smriti Irani-i Parliament nung tiyazü jembiba ajakji jungkai adoktsütsü, ta shiogo.
New Delhi nung osangbenertem senden ka nung jembidang Rohith’er kinüngertemi, “Rohith Vemula soseta asüba onük nung sorkari linük anisar. Sorkari tim mesüi telatetbatem agiba ajanga pa asü,” ta ashi.
Modi’er sorkar aija Rohith’er medemer Dontha Prashant-i, “Sorkari Hyderabad University dang Rohith sentoktsü tuyu,” ta ashi. Paisa, “Linük dang tiyazü jembiba atema aser Parliament nung sangdong tai agütsüba atema Irani nem temerenshi agütsütsüla, kechiyong iba ya Temzüng kübok aibelen ka lir,” ta ashi.
“Irani, iba ya act asütsü atema screen tila ka masü, iba ya atangji. Ochi jembitsüla, ochiji meyanglusatsüla. Nai ano tsürabur kwi timtemdaktsüner. Parliament nung iba onük nung kjembidang Irani-i aiben yazü jembiogo. Kechiba la nem temerenshi magütsür(?),” ta Rohith tetsü Radhika Vemula-i asüngdang.
Bodhbarnü Parliament nung jembidang Union Minister Irani-i, “Doctor ka danga pa anasai aotsü memela. Iba tanur shia arudaktsütsü atema shingaia memerang, pa doctor dangi anir aotsü shingaia memerang ta police-i osang agütsüogo. Ajisüaka pa tasümangji yimtenren hadir ka ama miima yur amshi. Iba anogo tasüngnep 6:30 ako tashi police aotsü memela. Iba o ya ni ashir masü saka Telangana police-i ashir,” ta jembia liasü.
Ajisüaka yashi osangbenertem den jembidang Chief Medical Officer, Doctor M Rajshree-ibo, “January 17 aonung 7:20-7:30 ako tsüngda NRS hostel nungi kü dang kaketshir ka soseta asütsü merang, anungji iba tesemi ilunga arung ta ashi, iba tesemji ni minute asem tsüngda atong,” ta shiogo.