Iranian tanker apuba asoshi Britain-i timtem ajurutsü: Rouhani

Dubai, Chiteni/July 10 (Agencies): Iran nunger totzü abenba rong apuba asoshi Britain-i timtem ajurutsü, ta Iran Tir Hassan Rouhani-i Bodhbarnü ashi.
Grace 1 ya tekeraba nung chioktsüla, ta Iran-i akhanger, koba tenokdangba agüja aliba nung aibelena Syria dangi totzü bener aor ta temulung melemi bilema British Royal Marines temi taoba hopta Gibraltar nung apu.
“Temulung melemtepba tenzükerji na (Britain) lir aser tatsüka lir nai iba atema timtem meteta arutsü,” ta Rouhani-i cabinet senden ka nung amenba sülen ashi.
“Tangbo na temulunglemtsü maka, kodang nenok indang totzü abenba rong region lenir arunüdir, nenoki nenok indang frigate tem bener arutsüsa akümtsü, kechiaser nenoki tsübur. Süra kechiba nenoki iba ama mapa inyak? Nenoki sadok sadoka jajatsü melatsüla asü,” ta Rouhani-i ashi.
Rouhani-isa ashiba agi, Iran-i uranium enrichment tali kümdaktsütsü asoshi telemtetba agiba ajanga power plant atema totzü tali agütsütsü aser tanga yimjung nükjidongtem nung yarisemtsü aser ibai 2015 nuclear tezüngzüktep kübok inyakba lir.
Tezüngzüktep agia aliba nung ama masü Iran-i inyaksangshir, ta Europe linüktemi Itan aitsür anogo ka lir pai iba o ya jembi.
“Nenoi (European) Iran atema shisabulu masütsüla, nenoki United States atema shisabulutsüla, shirnoki tezüngzüktep ajunga nung aibelena inyak aser alima ajunga inyaksangshi nung tetsükdaktsü ajurudaktsür,” ta Rouhani-i ashi.
2015 nuclear tezüngzüktep nung Britain, Germany, France, Russia, China aser Iran anünga lir, aser United States-i taoba küm toktsü.