Iraq aser Syria nung Khristantem yaritsü atema US nung Bill ka yanglur

Washington, September 22 (Agencies): Iraq aser Syria nung Khristantem aser tanga takoksa angurtem nem emergency aid agütsütsü atema bill ka Senate committee-i agizükogo aser ibaji Senate nung agizüktsü dang anünga lir.
Iba Bill dang House Resolution 390 aser Iraq and Syria Relief and Accountability Act ta ajar aser iba ajanga Iraq aser Syria nung kin anema inyakba maparen nung takoksa angur, meimchir anema inyakba tatalokbatem nung emergency relief agütsütsü.
Iba bill ji Rep. Chris Smith, R-N.J-i ketdangsüa inyak aser taküm June ita U.S. House nung agizük saka taoba Bodbarnü ang Senate Foreign Relations Committee-i agizüka liasü. Iba sülenji ang floor vote ka agitsü.
Bill nungsa shia aliba agi, kin anema inyakba nung shilem agiba nisungtem indang temetettsü tanga linüktemia agütsütettsü.
Maneni, bill nungsa attorney general-i U.S ozüng nung metokmeperi kar lira reprangshimtsü aser itemji tajungba yanglushir kin anema inyaker, meimchir anema inyaker mesüra war crimes nung aibelenertem merenshitsü akok.
Mongulbarnü vote nung takok angubaji Erbil nung aliba Chaldean Archeparchy atema teimla agütsür. Iba arogo nung Islamic State kiralongrar teloki takoksa agütsüba Khristantem yariri, ta Smith-i ashi.
“Chaldean Catholic Archbishop Bashar Warda-i ISIS nungi jenbur Khristan 95,000 shi yaria arudar” ta Smith-isa shisem.
“Iba khuret nung U.S-i meyaritepbji mamanger” ta paisa metetdaktsü.
2014 nungi IS-i Iraq o Syria nung Khristantem anema mapa inyaktsü tenzükba sülen nisungtem tekolak atangba, pur aoba, alar kümdaktsüba aser reshikangshiba inyakyim balala inyaka arur. Iba ajanga nisung million aikati parnok talidak toktsür jena aotsüsa aküm.
U.S. President Donald Trump aser par sorkari iba tensa majungba ajiteta taküm August ita State Department-i International Religious Freedom Report saya.
“ISIS-i tamangba yimsü aika aser kin balala anema mapa inyaker. Parnoki tashiyim agi shi nung medemer, alar kümdaktsür aser tepseter. ISIS-i Yezidis, Christians, aser Shia Muslims samatsütsü atema mapa inyaker” ta Secretary of State Rex. W. Tillerson-i report nung shia lir.
“ISIS-isa Sunni Muslims, Kurds, aser tanga telok tilatem anema mapa inyaker aser samatsütsü meranger. Item nisungtem kümzüka ayutsübaji Trump Administration indang tongtipang teinyaktsü ka lir” ta paisa ashi.
American Center for Law and Justice amala teloktemi United Nations dang Khristantem timtemba ajitettsü ayongzükogo.
U.N.-i Iraq nung kin samatsütsü merangba onük agizükogo saka parnoki ibaji Yazidi minority pur dak dang tuluba agütsür.
Africa, Global Health, Global Human Rights and International Organization Subcommittee mendenbuba Smith-isa taoba tir Barack Obama-i teyaritsü tim meyariba atema aitsü.
“Tesüiba küm asem tsüngda tiri balaka meyaritep” ta yaküm December ita Smith-i metetdaktsü.