Iraq bomb lendong nung nisung 39 asü

Iraq nung security temi bomb apokba tesem mita reprangba noksa nung angur. Iraq temeshi yimti Samarra nung Deobarnü ambulance ka nung tapoktsü sünga aliba ka apok.

Tikrit (Iraq), November 06 (Agencies) : Deobarnü Iraq kübok Salahudin province nung tapoktsü tesashi anaben apokba den injang lendong atalokdang ajak agi nisung 39 asü aser nisung 40 shi yiru, ta Tikrit nung aliba ketdangsertemi ashi.
Deobarnep yakta iba province yimtiba Tikrit nung tapoktsü sünga tsüngdener aliba pongdang tulu ka apu ka anasa apok. Iba yimti ya linük yimtiba Baghdad nungi kilometre 170 shi pilar lir. Iba lendong nung nisung 13 shi asü aser nisung 30 dak tema yiru, ta osang kar ajanga Xinhua news agency dang metetdaktsü.
Ano tatalokba balaka nung, Baghdad nungi kilometre 120 pilar aliba Samarra yimti nung gari anenba tesem ka nung gari ka sünga tapoktsü aliba ka apokdang nisung 10 dak tema asü aser nisung 10 dak tema yiru, ta ketdangser kati metetdaktsü.
Iba gari apokdang anasa aliba gari aika nung mi jangroloka tesem nung aliba nisungtem yiru, ta osang ajangsa ashi.
Anepdang tsütsü, Islamic State (IS) telok den sendaktepa alir telok ta temulung melemi bilemba telok kati Tikrit nungi kilometre 50 shi pilar aliba, Tulul al-Baj tesem nung aliba tribal lenir ka ki kakpoka atu, ta osang ajang ashi.
October ita Iraq nung lendong balala atalokdang Iraq nunger nisung 1,792 süogo aser nisung 1,358 yiruogo, ta Iraq atema United Nations Assistance Mission sangdong ka ajanga metetdaktsü.
Aikati iba ama animesüngzüktet tia aser azüdokshiba den IS amala telungpur poktetba ya 2003 küm March ita nung US nunger Iraq limai pakoka aita linük amanglemba ajanga lir ta tai tongloktsür.