Iraq force temi Mosul tanaben meyipa agiogo

Mosul, November 20 (Agencies) : Honibarnü Iraq security force temi Mosul yimti anülolentip tsütsü aliba jila ka den yimtsüng ka tanaben meyipa agishiogo. Item tesemtem agiyonga aidang anüdoklentip tsütsü special force temi IS telungpur den rara tesashi rara yonga ai, ta security osang ka ajanga metetdaktsü.
Army 9th armoured Division-i maneni Mosul nungpoka ia Mosul anüolentip Nimrud tiyong tsütsü aliba Khedhr al-Yas jila aser Qara-Shor o Kahriza yimtsüngtem nungi telungpur aridokja iba tesem süngjema kümdaktsü, ta Joint Operations Command (JOC) sangdong ka ajanga ashiba Xinhua osang ajanga metetdaktsü.
Nimrud ya Mosul anüolentip nungi kilometre 30 shi pilar lir aser anogo ishika tejangdanga iba tesem nungi IS telok aridoka liasü.
IS telungpuri raksatsüba Nimrud nung aliba ancient Assyrian ruin ya 13th century B.C nung nguteta Assyria yimtiba aküm.
Mosul anüdoklen Counter-Terrorism Service (CTS) nung commando temi IS telungpurtem den maneni raraba ajanga anüngdang tashi nungbo Muharibin aser Mu’alimen district tem tanaben amanglemtettsüsa aküm, ta JOC sangdong nungji shia lir.
Iba sülen sepaitemi nikongdang tsütsü ano item tesemtem nung khen kanga junga mita aodang IS puri yutsüba tapoktsü tesashi ali nung rema aliba aika ngutet, ta kasa sangdong ajanga ashi.
October 17, 2016 nü Ato Kilonser Haider al-Abadi-i, linük nung aliba yimti tulutiba rongnung tanabuba Mosul kanga sashia amaktsü, ta sangdonga liasü.
Iba sülen nungi Iraq security force temi Mosul anüdoklen nungi ia iba tesem agitsü maparen tenzük.