Iraq-i IS Mosul yimti nungi makdoktsü mapatong tenzüker

Islamic State (IS) kiralongrar ket nungi Iraq kübok Mosul yimti tanaben agishitsü mapatong tenzüka, Peshmerga sepaitemi Mosul yimti bushia ayamesoba noksa nung angur. (Mosul, October 17)

Baghdad, October 17 (Agencies): US-i aniba alima teloktep mitkartemi nungitba Iraq mitkartemi Islamic State (IS) kiralongrar telok Mosul yimti nungi meshimeshia makdoktsü mapatong tanü, Hombar nü tenzükogo.
IS teloki nisung million 1.5 shi alidak, Mosul yimti küm ana tejaklen tashiyim agi agiba sülen par teloki idakji tesepti tenteta, Iraq aser Syria na lushi tulubaka agitsü tenzük.
Iraq mitkartemi taoba 2015 küm nungi tenzüka IS ket nungi lushi aser yimti balala tanaben agishitsü mapatong tenzükba sülen tan Iraq aser par telok yarir Kurdish Peshmerga sepai o Sunni Tribal tongpang rarar densemba nisung 30,000 shi Mosul yimti bushia aotsü tenzükogo.
US-i aniba alima teloktep mitkartemi par tayimtsü amshia, Iraq tesem timbaka nungi IS telok takok ngua makdokba sülen Mosul yimti nung IS züngsem 4,000 nungi 8,000 shi tanga jenoka alitsü akok ta temulung melemi bilemer.
“Tayimtsü nungi mongudaktsütsü nükjidong nung IS teloki par patrolling motorcycle nung mener agir,” ta Mosul yimti nung alir, Abu Maher-i osang jangjashitsü.
Tan Mosul yimti tanaben agishitsü mapatongji ita junga agitsü akok ta bilema, Mosul nung alir nüburtemi chiyongtsü rizünga ayuba aser pei talidak prangpong injang aser bomb-tem nungi kümzüktsüsa renemshiba osang angazükogo.
Iraq mitkartemi alizüng ayuba ama, Mosul yimtiji tanaben agishira, Syria kübok Raqqa yimti dang IS teloki amokbangba yimti akümtsü.
“Tan Mosul yimti IS ket nungi tanaben agishitsü mapatong ya IS telok meshimeshia samatsütsü mera tongti ka agir lir. Iraq mitkartemi IS madak takok ngua, Mosul densema, par Iraq ajunga IS ket nungi kümzüktsü amanger,” ta US Defense Secretary, Ash Carter-ia metetdaktsüogo.
US-i aniba alima teloktep mitkartem, Kurdish sepaitem aser Iran-i nungiba Iraqi Shiite mitkar teloktemi tongpang kanga sashia raratsü tenzükba sülen IS teloki yaküm, 2015 küm tatemlen nungi tenzüka, Iraq toktsür ajentsü tenzüka lir.
“Tan Mosul yimti tanaben agishitsü mapatong nung Peshmerga sepai züngsem 4,000 shi shilem agitsü tenzüka lir,” ta Iraqi Kurdish military command-ia metetdaktsü.
Ano külen, “Sunni nisungtem timba alidak, Mosul yimti telungi Iraq mitkar aser police züngsemtem dang yoktsü,” ta shia, Mosul nung alir nüburtemi Iraq mitkar aser police den amaliteptsü ajungshiba den tan Mosul yimti tanaben agishitsü mapatong inyakba ajanga kin o kin na tsüngda tongpang raratsüsüsa tensa bener marutsütsü ta Iraq Ato Kilonser, Haider al-Abadi-ia metetdaktsüogo.
Tan Mosul yimti tanaben agitshitsü mapatong nung Shiite nisungtemi tentetba sepai teloktem nem tongti shilem agidaktsüba ajanga Shiite aser Sunni kin na tsüngda tongpang raratsüsa tensa tamajung bener arutsütsü akok ta Turkey aser Saudi Arabia na densema, Sunni yimsüsür aser Sunni nisung kanga lungsoa aliba linüktemi sangoktsüba sülen Abadi-i iba olenji tanep metetdaktsü.