Iraq-i Islamic State kiralongrar anema F-16 amshitsü tenzükogo

Baghdad, September 6 (Agencies) : Tang mezüngsüa Iraq-i Islamic State telok anema rara nung F-16 tayimtsütem amshitsü tenzükogo aser item tayimtsütem ya United States ket nungi alizükba lir, ta Deobar nü Iraq air force commander-i ashi.
“Tesüiba anogo pezü tsüngda anüng nungi amakdang nisung ter ser pongu süogo” ta Baghdad nung Staff Lieutenant General, Anwar Hama Amin-i osangbenertem dang ashi.
“Anüng nungi amakba mapang ‘smart weapons’ amshiogo” ta Amin-isa ashi.
Anüng nungi amakba ajanga tajangzük aika nguogo aser tarutsü anogotem nunga tayimtsü amshiba ajanga rara nung teyari tulu angutsü, ta Defence Minister, Khaled al-Obaidi-isa ashi.
F-16 tayimtsütemji Baghdad anüdoklentip tsütsü aliba Salaheddin aser Kirkuk province tem nung amshi, ta Amin-isa shisem.
Taküm July ita tom ka nung United States nungi Iraq-i F-16 tayimtsü pezü bener aru. United States-i Iraq dang F-16 tayimtsü 36 ayoktsü nangzüka lir.
June 2014 nungi IS-i Iraq nung tesem aika makdoka agiba ajanga tensa mejungi aküm aser iba jagi US-i F-16 tayimtsütem agütsütsü asoshi timtem ajuru.
Iraq nunger pilot tem F-16 anitsü atema Arizona nung training agir. Taküm küm tetenzüklen Arizona nung Iraq nunger pilot ka pai aniba F-16 tayimtsü tsüoka süogo.

You must be logged in to post a comment Login