Iraq-i küm 40 tsüngda nung 1 buba Miss Iraq shimer

Miss Iraq 2015 tetoktepba final nung temaba jenjang ngua Miss Iraq takok korang agizükba sülen arishi küm 20 tain Shaima Qassem pelaba noksa nung angur. (Baghdad, December 20)

Baghdad, December 20 (Agencies): Iraq northeast tsütsülen, Kirkuk yimti nung alir aüir kati temaba jenjang ngua 2015 Miss Iraq takok korang agizükogo.
Arishi küm 20 tain Shaima Qassem-i külem tokteper 7 den temaba jenjang ngua iba takok karong agizükba sülen Miss Universe tetoktepba nung shilem agitsü jenjang tajung nguogo.
Tesüiba mapang, 1972 küm agiba sülen tan mezüngsüa ayongba tetsür tabor tajungtila shimtsü tetoktepba sentong final Baghdad nung ang agitsüsa akümba osang jangjaogo.
Islam tamangba yimsü kanga metsünga reta benshirtemi amokmerentsü tenzükba yong tetoktepba final-ji mezüng sentong renemba ama, Basra yimti nung magitettsüsa aküm.
Alima jenjang nung ayongba tetoktepba yimya ajunga benshia tan tetoktepba ya ayongtsü merang saka sobaliba agi memelaba yong tzüwatsü sübotsü tetoktepba shilem magiba den külemi, tan tokteper tetsürtemi tetsüng temokok adena aluba sübotsü sema tetoktepba nung shilem agia liasü.
Tan toktepertem rong nung kati par linük tentetba dam tulutiba, Mosul dam yanglushitsü alizüng ayuba lemsatep aser Shaima-i Iraq nung kaketshisatsü bushitsü mapatong tajungba kümdaktsütsü alizüng ayuba lemsatepa liasü.
“Ni ozü Iraq nem tejaklen mera agidaktsüner. Tan tetoktepba sentong ayonga agiba ajanga Iraq nüburtem nem tepela tulu bener arutsüogo,” ta Shaima-i takok korang agizükba sülen metetdaktsü.
Taoba Iraq lenisang, asür Saddam Hussein’er kinünger, Ahmed Hassan al-Bakr-i Tir inyakdang, 1972 küm alima jenjang nung ayongba Miss Universe tetoktepa den sentaktepba Miss Iraq tetoktepba agiba sülenbo Iraq-i tan mezüngsüa iba tetoktepba ya ayonga agiogo.
Ano külen, tasüba agi amokmerenba yong tan tetokpba nung shilem agir aüir anati tetoktepba sentong tom nung shilem magitsü lemtetba osanga jangjaogo.