Iraq-i Turky sepai nem linük azüokdaktsüba anemer

Baghdad, December 13 (Agencies): Baghdad nung nisung noklang aika adenshia Turkey sepaitem Iraq-i aidaktsüba anema lungkak aita, Trukey yimtiba Ankara, inyakyim ajanga Iraq nüburtem temeten raksatsür ta ashi.
Lungkak aitertem ya Honibarnü al-Tahrir Square, Baghdad nung adenshi aser parnoki Turkey sepaitem anema yimyim balala ayima liasü. Parnoki ashiba agi, Iraq sorkari dang nungi temelaba magi-i aser memeteti Iraq anüolentep tsütsü Turkey sepaitem aidaktsü, ta Xinhua osang ajanga ashi.
Lungkak aitertem aikati Shia unit nung Hashd Shaabi sepaitem indang sobutsü sobur liasü. Parnok aikati, ‘bendanger linük nem mamokbangdaktsüi sadoka alitsüji onok temeten lir,’ ta o zülu tululu ama liasü.
Tesüiba mapang Tatong Tir Nuri al-Maliki aser Badr telok nung tekolakba Hadi al-Ameri nati iba lungka ania liasü.
Ameri-i, “Linük nung nübur temeten raksaja bendang lima nungi sepai aitba ajanga Iraq nung telemdang adokdaktsür aser linüki bendang lima nungi sepai arubaji nokdangtsü nüngdak,” ta sangdong ka zünga metetdaktsü.
Ameri-i aniba Badr telok dang mezüngbo Badr Brigade ta ja-a liasü aser parnoki ashiba agi, parnok ya kidanger linük Iran den tesendaktep tajung lir. US-i aniba teloki 2003 küm Iraq amakba mapang parnok telok ya linük asoshi rarar tashi tait telok ka liasü aser iba sülen küm ishika lir yimtenren tsütsü inyaker telok aküm.
Badr Brigade ya Iraq indang Islamic Supreme Council nung tashikang ka amai liasü aser iba telok ya Shia nunger tamangtir, Ammar al-Hakim kübok liasü.
Taoba hopta “Defence of Sovereignty” onük nung ajemdaker Ameri aser Maliki nati Turkey sepai anema lungkak aitsü asoshi ayongtep.
Hokolbarnü Shia nungi tamang nung lenir Grand Ayatollah Ali al-Sistani-i, linük nüburtem temeten raksatsür telok shinga dena angatettepa meinyaktsüla, ta sorkar dangi temepishiba ka yokogo.
Kasa anogo nung, Iraq Ato Kilonser Haider al-Abadi-i, Turkey sepaitem linük telungi aitba dak sentakba nung UN Security Council dangi takhangba ka yokang, ta foreign ministry nem tetuyuba agütsüogo.
Turkey Tir Recep Tayyip Erdogan-i, Turkey nungi yokba sepaitem Iraq nungi anientsübaji otsü mali aser tang Iraq nung aliba Trukey sepaitemji training dak sentakba sentong asoshi aitba lir, ta ashiba sülen anogo ananü lir iba lungkak ya aitsü tenzük.
Iraq nung Turkey sepaitem ya 2002 küm nungi alir aser ano Iraq Ato Kilonser Haider Abadi-i mepishiba sülen 2014 küm talila yoksem, ta Erdogan-i ashi.
Mosul tesem nung aliba Turkey nunger sepaitemji rarar telok ama mashi saka training agirtem lir. Anungji parnok anientsübaji kecha otsü mali, ta pai ashi.
IS telok den raratsü atema Iraq sepaitem nem training agütsütsü asoshi Turkey nungi arua sepai training agirtem, battalion ka, raradang amshiba oset teperi bener Mosul yimti ao, ta osang angashiba sülen iba mepetmesü ya adokba lir.