Iraq: IS kiralongrar 40 aser Iraq police 3 shi asü

Iraq anüdoklentip tsütsülen, Mosul yimti nungi anülulentip tsütsüleni kilometer 55 shi pilar, al-Qayyarah jila nung Islamic State (IS) teloki lendong atalokdaktsüba sülen Iraq mitkar aser nüburtem lendong atalokdak sentepa aliba noksa nung angur. (Al-Qayyarah, November 19)

Baghdad, November 19 (Agencies): Islamic State (IS) kiralongrar teloki Iraq anüdoklentip tsütsülen mitkar tesep ka amakba sülen IS kiralongrar 40 shi aser police ketdangser 3 shi tanü, Honibar nü asüba osang ka sorkar ketdangsertemi metetdaktsüogo.
Tanü lendongji IS tesepti, Mosul yimti nungi anülulentip tsütsüleni kilometer 55 shi pilar, al-Qayyarah jila nung tenteta Iraq mitkar tesep nung atalokba osang jangjaogo.
“IS kiralongrar nisung 200 shi rong amshia, Tigris ayong ajangdanga al-Qayyarah tonga aoba sülen tanü lendongji atalokdaktsüba osang angazükogo,” ta Nineveh Provincial Parliament nung Security Committee lenisang, Mohamed Ibrahim al-Bayati-i osang jangjashitsü.
Paisa ashiba agi, tanü amakertemi pei temang nung alenokba bomb pokdakja lendong atalokdaktsüba den tongpang nung amshitsü prangpong amshia par amakba maparen inyak aser Iraq mitkar aser police züngsemtemi ghonda 4 dak tema raraba sülen ang kiralongrartem madak takok ngua liasü.
“Tanü lendong nung police ketdangser 3 poksetba aser parnok 3 tashi yiruba osanga jangjaogo,” ta Bayati-isa shisem.