Iraq: IS teloki Shiite nisung 35 tepset

Baghdad, July 08 (Agencies): Peisasa pokseta asütsü mulungteter Islamic State (IS) kiralongartemi pei temang nung alenokba bomb pokdaktsüba den külemi, parnoki tongpang nung amshiba prangpong amshia Shiite kin nisungtemi Baghdad anüdoklentip tsütsülen tentetba tekülemdak yashi, Brehostibar nü lendong atalokdaktsüba osang ka Iraq sorkar ketdangsertemi tanü, Hokolbar nü metetdaktsüogo.
“Yashi Sayyid Mohammed tekülemdak atalokba lendong nung ishiba agi nisung 35 asüba aser nisung jenti yiruba osang tang tashi nung jangjaogo,” ta parnoki ashi.
Tawa Baghdad nung tentetba tongti shishilembadak nisung noklang aika tepseta lendong atalokdaktsüba sülen anogo ishika süir tan lendongji ataloker lir.
Baghdad nungi kilometer 75 shi pilar, Balad nung tentetba tekülemdak Shiite nisungtemi par sarasadem sentong agia alidang yashi amakertemi tongpang nung amshiba mortar bomb kalokja amakba sülen parnoki tekülemdak telungi ia idakji sarasadema alir dak injang kaloktsütsü tenzük.
Ano, peisasa pokseta asütsü mulungteter IS züngsem anati tekülemdak anasa tentetba shishilembadak pei temang nung alenokba bomb pokdakja lendong atalokdaktsüba osanga jangjago.
Ano külen, Baghdad yimtiba nung tawa lendong kanga sashia atalokba sülen Iraq Ato Kilonser, Haider al-Abadi-i par Head of Security-a lenisütsü menden nungi anendaktsüba osang angazükogo.