Iraq mitkartemi IS ket nungi Fallujah sorkar ki tanaben agiogo

Fallujah, June 17 (Agencies): Iraq mitkartemi ita ka shi agia Islamic State (IS) kiralongrar telok den tongpang kanga sashia raraba sülen Fallujah yimti municipal ki IS ket nungi tanaben tanü, Hokolbar nü agiba osang ka metetdaktsüogo.

US mitkartemi par tayimtsü amshia pokshitsü oset tsükdakja yariba sülen Iraq mitkartemi IS telok Fallujah yimti tiyongtsü nungi makdokteta tan IS telok madak takok angur lir.

Fallujah ya Iraq yimtiba, Baghdad nungi anülulen tsütsüleni kilometer 69 shi pilar Al Anbar province nung tentetba tongti yimti ka lir.

“Iraq miktartemi Fallujah nung tentetba ki tongtiba, sorkar ki IS ket nungi tanaben agishiba ajanga teloktep mitkartemi IS madak takok anguba temaitsü tajung angur lir,” ta Iraq’er federal police lenisangia metetdaktsü.

IS teloki 2014 küm tashiyim agi agiba sülen par teloki Fallujah jila ya par tesepti ka ama amshia liasü saka taoba ita ka tejaklen nungi tenzüka Iraq mitkartemi par telok den tongpang kanga sashia raraba sülen tanübo parnoki Fallujah yimti shilem tuluba ka takok ngua agiba osang bushiteta lir.

“IS züngsem timbaka Fallujah anülulen tsütsüleni ajentsü tenzükogo. Anungji, Fallujah yimti telung nung par züngsem ishika ka dang anünga lir,” ta Iraq mitkar lenir, Lieutenant General, Abdulwahab al-Saadi-ia metetdaktsü.