Iraq mitkartemi ISIL ket nungi Mosul nung aliba mosque rakzükogo

Baghdad, June 29 (Agencies): ISIL telungpur temi küm asem tejaklen ‘caliphate’ sangdongba tesem, Mosul nung aliba Muslim nunger tenlaki al-Nuri Mosque teraksa ya Iraq nunger mitkartemi agitetogo, ta Iraq Ato Kelonser, Haider al-Abadi-i ashi.
Küm 850 tain al-Nuri Mosque agitetba ajanga Iraq mitkar temi ISIL ket nungi Mosul rakzüktsü asoshi ita ti dak tali rara aruba indang takok sayuogo. Mosul ya Iraq nung ISIL indang yimtiba amai liasü.
“Mitkar küboki al-Nuri Mosque aser al-Hadba minaret aitba ajanga linük nung ISIL mesüra ISIS koktetba sayur,” ta Ato Kelonser-i ashi.
Islamic State of Iraq & Levant (ISIL) den raraba ya ano anogo eshika alitsü südi, kechiyong iba telok ya kiyonger yimtitem nunga brokshia alitsü, ta Iraq nung ketdangser temi ashir.
Iba Muslim nunger tekülem ki ya tuluba ka ISIL-i taoba hobta pokdoka liasü.
Al-Hadba minaret ya Mosul nung tongtibang tesem ka liasü aser Iraq nung ISIL yimsüsüba nunga tongtibang tesem ka lir.
Iraq indang yimti tulu rongnung tanabuba, Mosul nung 2014 küm Hokulbarnü Muslim nungertem sarasademba mapang Baghdadi ya arua Muslim nunger dang pa akhum tsübutsü ashi aser nüburtem dangi pa arua o jembiba iba anogo ya tatembang liasü.
Iba sülen küm asem lir Baghdadi ya kong aliar memeteti aküm aser ISIL temi amokbanga aliba linüktem ya Iraq mitkar temi agiyonga ao.
Iba minaret ya ISIL teloki June 21 nung bomb agi pokdok.
12 century mapang yangluba minaret raksadang alima ajunga aoksatep.