Iraq mitkartemi Mosul yimti tanaben agishitsü mapatong tenzüker

Irbil, March 24 (Agencies): Kurdish Peshmerga sepaitemi nungitba Iraq sorkar mitkartemi Islamic State (IS) kiralongrar telok ket nungi Mosul yimti tanaben agishitsü mapatong tanü, Brehostibar nü tenzükba osang jangjaogo.

US mitkartemi tongpang raratsü terenemshiba agütsür, Iraq’er 15 buba Division mitkar telok nungi brigade 2 tashi tanep nungi tenzüka Mosul yimti southeast tsütsülen densemba yimtsüngtem nung atsüka alir IS züngsemtem den tongpang raratsü tenzüka liasü.

“Iraq mitkartemi IS ket nungi Mosul yimti tanaben agishitsü mapatong tenzükogo. Ajisüaka, IS telok den kanga sashia raraba sülen ang par ket nungi Mosul yimtiji tanaben agitettsü,” ta Iraqi Kurdish Peshmerga sepai lenir, General Najat Ali-ia metetdaktsü.

“Tanep nungi tenzüka tang tashi nung Iraq mitkartemi IS ket nungi yimtsüng 2 tashi agiogo,” ta shia, Mosul yimti tanaben agishitsü mapatong nung US-i aniba alima teloktep mitkartemia par tayimtsü amshia Iraq mitkartem den yaritepba osang ka General Ali-isa ashi.

“IS tesepti, Mosul aser tanga Iraq yimtitem ajurutepdaktsüba lenmang den Tigris ayong ajangdangtsü Qayyarah apu tamasa agitsüji kanga dang tongtipang ta angateta, Iraq mitkartemi tongti lenmang aser apu tentetba tesemtem mezüng agitsü maparen tenzüka lir,” ta Peshmerga sepai lenir tanga ka, General Hussein Nooraldin-ia metetdaktsüogo.