Iraq nem küm 3 tsüngda nung sen bn 5.4 aputsütsü: IMF

Amman, May 19 (Agencies): Totzü jenjang kanga ajema akümba ajanga rongsenren jenjang mejungi akümba Iraq linük nem taruba küm 3 tsüngda nung dollar sen billion 5.4 tashi aputsütsü renemba osang ka International Monetary Fund (IMF)-i tanü, Brehostibar nü sangoktsüogo.
Jordan kübok Amman yimti nung osangbener den ajurutepa senden ka amendang IMF ketdangser, Christian Josz-i tanü iba osangji metetdaktsü.
Alima jenjang nung tentetba shishilembadak totzü jenjang ajema akümba ajanga totzü ayokba linük, Iraq’er rongsenren jenjang kanga mejungi akümba osang bushiteta lir.
Ano, Islamic State (IS) ta ajaba kiralongrar telok tetsüti-i 2014 küm nungi tenzüka Iraq nung lendong kanga sashia atalokdakja, Iraq lushia tuluba ka tashiyim agi agiba sülen Iraq sorkari IS telok anema raratsü asoshi par senpong nungi sen jenti amshitsüsa akümba osanga bushitetogo.