Iraq: Nübur 15 aser police ketdangser 8 shi pokset

Mosul, December 22 (Agencies): Iraq anüdoklentip tsütsü, Mosul yimti nung pokshiba lendong 3 tashi tanü, Brehostibar nü atalokdaktsüba atema Islamic State (IS) kiralongrar teloki tenüng agia metetdaktsüogo.
Iraq sorkari ita 2 shi tejaklen IS ket nungi tanaben agishiba tesem, Mosul kübok Kokjali nung tentetba shishilembadak car gari nung alenokba bomb 3 tashi tanü pokdakja, lendongji atalokdaktsüba osang sorkar ketdangsertemia jangjashitsüogo.
“Tanü lendong nung nübur nisung 15 aser Iraq police ketdangser 8 tashi densema, ajak agi nisung 23 tashi poksetba osang tang tashi nung jangjaogo,” ta Iraq mitkartemia metetdaktsü.
US-i aniba alima teloktep mitkar züngsem 100,000 shi nungtiba Iraq mitkartemi IS telok tongti tesep, Kokjali tesemji taküm October ita 17 nü IS ket nungi tanaben agishia liasü.
IS telokia par tesep toktsüba jakdang pokshitsü osettsü yutsüba ajanga nübur jenti pokseta yirudaktsüba osang bushiteta lir.
Mosul yimti nung nüburtem nem teyari agütsüba mapatong inyaka alidang mortar bomb tsükdakja tan hopta lendong atalokdaktsüba sülen teyari agütsür Iraq ketdangser 4 aser nübur 7 shi tepsetba osang ka United Nations (UN)-ia tanü metetdakja liasü.
“Teyari nungdaka alirtem nem lendong bener marutsüi parnok kümzüktsü nungdaker. Tongpang rarar telok ajungai alima jenjang nung renemtsüba meimchir temeten kümzüka ayutsüsa inyaktsü ajungshir,” ta par tenteti ajungshia ashi.