Iraq nüburtemi International Zone nung sorkar anema longkak ait

Baghdad, May 21 (Agencies): Iraq yimtiba, Baghdad tiyongtsülen, Karkh district nung tentetba International Zone (IZ) nung nüburtemi Iraq sorkar anema yashi, Hokolbar nü aser tanep, Honibar anepdang tashi kanga sashia longkak aitba osang jangjaogo.
Tan sorkar anema longkak aiter rong nung sorkar anema nokdaker, Shiite putir, Muqtada al-Sadr sülen anidaker jenti densemba osang jangjaogo.
Tawa Iraq nung talisa, Baghdad yimtiba nung pokshiba lendong ishika ataloka nisung 100 dak tema pokseta tensa mejungi akümba sülen par sorkar dang mepelaba metetdaktsütsü nükjidong nung tan nüburtemi par longkak aittsü sentongji agia, police dena raraba osang bushitetogo.
Ajisüaka, police-i injang aser tenük mesepdaktsütsü tango kalokja longkak aitertem meindokba sülen tanü nikongtsütsü tashi nung tensa junga akümba osang jangjaogo.
Tan longkak aitertemi Iraq Ato Kilonser office densema, sorkar office ki aika kilungi tashiyim agi ia osettsüset raksatsüba atema aitsüba olen ka Iraq Ato Kilonser, Haider al-Abadi-ia metetdaktsüogo.
“Sorkar office aser tentet balalai tashiyim agi ia, osettsüset raksatsübaji khen yongi magizüktetba maparen lir aser kasaji kanga sashia aitsür,” ta Abadi-i sangoktsü.
Hopta asem tejaklena sorkar anema longkak aitertemi par longkak aittsü sentong agia, Iraq parliament ki telungi tashiyim agi aitsü merangba osang bushiteta lir.
Iraq nung mapang shia lendong tsüdong atalokba, par linük indang rongsenren jenjang mejungi akümba aser sorkari nübur taküm kümzüka ayutsü asoshi nungdakba maparen takok ngua meinyakba agi lakteta, nüburtemi sorkar anema longkak aittsü tenzüker lir.