Iraq nung election agir; Abadi atema tongpang tulu asütsü

Baghdad/Mosul, Monupii 12 (Agencies) : Iraq nung Islamic State-i tamakok anguba sülenbo tan mezüngbuba tanü Küptoknü linük nung election agiogo.

Osang ajanga ashiba agi, Iraq Ato Kilonser, Haider Abadi shibai United States aser Iran naprong den alliance yanglua lir, pai tashi tulu aliba Shi’ite political teloktem nem yimsü mesüdaktsütsü meranger.

Tashi amshia ambangyim agi Iraq lima yimsü asüsang Saddam Hussein yimli jirepba sülen tang agi pezübenren election agitetba atema Iraq nungertemi nüma tanga bilemer.

Aji oda süaka, election agiba ajanga linük süngjema kümdaktsütsüji teimla kangarabo mali kechiaser par lima nung telok balala tsüngda raratepba, rongsenren tsütsü tebilemtsü aser ochimashiba amala khuret balala agi neneta lir.

Reuters osangbenertemi ashiba agi, Baghdad, Falluja aser Basra yimtitem nungbo polling station aika nung vote agütsür kanga aikabo maliasü.

Abadi shibai küm pezü tejaklen yimsü asütsü maongka angu, pai asalentong tajung yanglur inyakba ajanga linük anaprong (US & Iran) den tesendaktep yanglua lir.

Iraq army nem Islamic State akozüka yokdaktsütsü atema United States-i parnok nem sepai teyari agütsü saka ano külen Iran nungeria Shi’ite militia-tem nungit.

Aji oda süaka tangbo ibaji tembanger asünung, Abadi atema yimtenren tsütsü tebilemtsü tulu aliba anaji pa jakdang liasüba lenir Nuri al-Maliki aser Shi’ite paramilitary group tuluba nung lenir, Hadi al-Amiri na lir; pa dang nungibo tenaprongji Iran den tesendaktep tajungba lir.

Saddam yimsüsüba atsüngdoktsü asoshi United States-i 2003 küm Iraq amak aser 2004 küma parnoki Islamic State den raraba nung yaritsü atema sepaitem yok.

Iran nungeri linük nung tetsüng ajemoka inyakba ajanga Sunni nungertem aser Shi’ites nungertema kar jashidaktsü.

Election dak sendakba asadanger mongintemibo Abadi jenjang tajungba ama bilemer saka takok angutsüji talangka pilar lir ta anagzüker.

Osang ajanga ashiba agi, Abadi-i aniba Victory Alliance purtemi menden teimba nung takok ngutetaka, coalition sorkar akümtsüsa adoktsü; election agiba sülen anogo 90 tsüngda nungsa sorkar akümtsüla.

Ano arishi küm 63 tain Amiri shibai Badr Organisation anir lir, pai takok ngutetra Iran atema maongka tajung lapoktsür asütsü, ta kasa osang ajanga metetdaktsüogo.