Iraq nung nisung 1,332 shi July ita asü: UN

Baghdad anülulentiptsütsü tentetba gari yanglushidak ka anasa gari nung alenokba bomb ka tanü Honibar nü pokdaktsüba sülen gari nung mi jangrua aliba noksa nung angur. (Baghdad, August 01)

Baghdad, August 01 (Agencies): Tang Iraq nung lendong kanga sashia atalokja aliba kiralongrar telok, Islamic State (IS)-i lendong ataloktsüba densema Iraq nung lendong balala atalokba ajanga taoba July ita nung ishiba agi nisung 1.332 shi asüba osang bushitetogo ta United Nations (UN)-i tanü Honibar nü metetdaktsüogo.
UN Mission to Iraq (UNMI)-i ashiba agi, taoba July ita asür rong nung nübur 844 aser IS telok den tongpang raraba Iraq mitkar aser mitkartem den yaritepba sepai züngsem 488 shi densema lir.
“Taoba July ita kisüng nung nisung 2,108 shi yirutsüba osanga bushitetogo,” ta shia, taküm June ita denbo July ita nisung asüba osangji tajemba lir ta UNMI-i ashi.
Taküm June ita nung ishiba agi nisung 1,466 asüba aser nisung 1,687 shi yiruba osang bushiteta liasü.
Nisung 335 shi asüdak, Baghdad nung taoba July ita lendong tesashiba atalokba osanga bushitetogo ta par teloki metetdaktsü.
“Iraq aser kidangsüa aliba Syria na nung ‘Caliphate’ yimli tenteter,” ta sangokja aliba IS teloki tashiyim agi agia aliba tesemtem nung nisung asüba aser yiruba osangbo tan bushitetba osang nung densema mali ta par teloki ashi.
IS teloki Iraq lushi shilem 4 nung shilem 3 shi tang tashiyim agi agia aliba osang bushiteta lir.
Ano, tongpang kanga sashia raraba ajanga pei talidak toktsür tanga tesemtem nung alirtemi nungdakba tajemtsü tzü, chiyongtsü aser mozü mora monguteti asüba osang tejangja mebushiteti aliba olen ka UNMI-i metetdaktsüogo.
Ano külen, Baghdad anüdoklentip tsütsü, Rashidiyah nung tentetba shishilembadak bomb lendong ka atalokba ajanga nisung 3 poksetba aser nisung 11 shi tanü yiruba osang ka police-i metetdaktsüogo.
Baghdad anülulentip tsütsülen tentetba gari yanglushidak ka anasa bomb lendong tanga ka ataloka nisung 1 poksetba aser nisung 9 shi tanü yirutsüba osanga jangjaogo ta parnoki ashi.
Ajisüaka, osangbener den iba amala osangtsüsang lemsateptsü temelaba agüja maliba yong parnok tenüng memetetdaktsütsü nangzüktepba sülen ang police ketdangsertemi tanü ataloka lendong osangji lemsatepa liasü.