Iraq nung pua aliba India nunger taküm lir: Sushma

New Delhi, March 09 (Agencies): Tanü External Affairs Minister, Sushma Swaraj-i, Iraq nung kiralongrartemi pua aliba India nunger tang tashi taküm lir aser parnok India-i anir arutsü atema sorkari meranga inyakdar, ta ashi.

Punjab nungi India nunger 40 shi yaküm nungi Iraq nung pua lir. Parnok rongnung jenbua alir kati tanüngbatemjibo tepseter alitsü südi, ta tamalen jembia liasü.

Lok Sabha nung Question Hour mapang Swaraj-i, parnok yangji ali asübo sorkari akhidangyongi anir arur lila, saka parnok kiralongrartemi pua lir, ta metetdaktsü.

“Parnok süogo ta ni khenyongi mamanger. Tebursangi ashibaji onoki amangra ni iba senden nung parnok ajak süogo ta jembila. Ajisüaka onoki tebursangi ashibaji mamanger, ibayongji onoki parnok maneni bushir,” ta ashi.

Tawa Arab linüktem nungi foreign minister tem senden nung Swaraj dena liasü aser iba dak sentakba nung lai ashiba agi, tongti linük ana nung tongti ketdangser anati la dang, India nungerji taküm lir ta shiogo.

Bendangeln alir India nunger junga alitsü atema sorkari nendaka inyaker ta shia Swaraj-i, parnoki ajuruba tebilemtsütem lenla ajaklen nungi yaritsü atema sorkari inyaker, ta ashi.

“Iba ama tebilemtsütem alidang ni nendaka repranger, aser ghonda 24 tsüngda item onük atema inyaktsü meranger,” ta ashi.

“Iba ama tensa nung ni parnok oshioben, state mesüra tamangba yimsü mebendangi inyaker. Ni asoshi, parnok ajakji India nunger,” ta laisa ashi.