Iraq nung shishilembaba tesem amakdang 115 asü

Baghdad, July 18 (Agencies): Iraq anüdoklen aliba Diyala province nung Islamic State (IS) teloki nübur aika aliba shishilemba tesem ka amakdang, tetsür aser tanur dena nisüng 115 tashi taküm lalutsüogo aser iba ya linük nung küm 10 tsüngda lendong tulutiba atalokba rongnung ka lir.
Police-i ashiba agi, iba truck gari ya Hokolbar aonung Khan Beni Saad jila nung aliba shishilemba tesem nung nübur aika alidak apokba ajanga tang benjung mapang pelatepba ajak tejashi aser tetsübu agi melen. Shishilembaba tesem ajakji nisung mang shisaba agi sünga liasü. Iba lendong nung tajemba agi nisung 170 shi yirur alitsü südi.
Pingana asüpba süngden tilatem kara-kara azüngteta yagi yirur alirtem tanurtem mozü kidangi anir ao aser teyirur taintem aika iba tesem sünga teyari ata-a liasü, ta tenük küli angur kari ashi.
“Iba lendong atalokba ajanga Khan Bani Saad ya tetsübutsü tesem ka kümogo, iba ya Eid benjung mezüng nü lir, nisung noklang junga süogo aser aika yiruogo ano tasümang maneni bushidar,” ta Diyala nung alir Sayif Ali-i ashi.
Iba lendong ya IS teloki agütsü ta parnok twitter account ajanga metetdaktsüogo.
Iraq parliament nung speaker, Salim al-Jabouri-i ashiba agi, Diyala tesem nung sorkari security akhangshitsü sentong yangludar.
Ajisüaka iba province tejashi agi süngogo. Yaküma item telok yagi jila aika ambangyima liasü saka Iraqi o Kurdish sepaitemi anir item jila tem meyipa agiogo. Saka telungpur o sepai na maneni teraradak lir.
“Onok Eid benjung asoshi renemtsü atema pelashishia shishilembai ao, ajisüaka lendong ajanga kinünger adianu asüba agi iba tepelaji shisa bulu aser tetsübu shisatsü agi asüng, aser ajakji sorkari nüburtem kümzüka alitsü asoshi kecha meinyaktetba ajanga lir,” ta iba tesem nung alir kati tetsübu agi pa tenüng memetetdaktsüi ashi.
Hokolbar nü iba lendong atalokba sülen Honibar nü Diyala tesem sünga security aruogo aser parnoki mita aoba maparen tenzükogo.
“Iba tetsübutsü mapa ya meimchir nüji mapabo masü,” ta United Nations nungi Iraq mission atema yoksang Jan Kubis-i ashi.
Diyala nungeri IS telok aküm metsübuba ajanga yaküm August ita nung Diyala nung aliba Mosque ka telungpuri amakba mapang nisung 64 tashi taküm laluja liasü.