Iraq nung tai maketba nisung 19,000 shi tepsetogo: UN

United Nations, January 19 (Agencies): 2014 küm January ita nungi tenzüka yaküm, 2015 küm October ita tsüngda nung tai maketba Iraq nunger nisung 19,000 shi tepsetba aser nisung million 3 dak temai pei talidak toktsüba osang ka United Nations (UN)-i tanü, Mongolbar nü sangoktsüogo.
2014 küm tum nungi tenzüka Islamic State (IS) ta ajaba kiralongrar teloki Iraq anüdoklentip aser anülulentip tsütsülen densemba tesemtem tashiyim agi agia lendong atalokdaktsüba den külemi, US-i aniba alima teloktep mitkartemi yaküm August ita nungi tenzüka par tayimtsütem amshia IS anema raradang Iraq nübur meyirijang jenti tepsetba osang bushiteta lir ta UN-i metetdaktsü.
“Tan nisung asüba osang bushitetba ya Iraq nung tongpang balala raradang asürtem indang osang dang lir. Ajisüaka, Iraq nung tongpang raraba ajanga chiyongtsü, tajemtsü tzü aser nungdakba mozü mora peria mongui asür nisungtembo mezüngdangteti lir,” ta United Nations High Commissioner for Human Rights, Zeid Ra’ad al-Hussein-i kanga temulung shiranga ashi.
Ano, IS teloki Yazidi nübur tima densema, nisung 3,500 shi alar ama yua aliba osanga bushiteta lir ta pai shisem.
UN-isa ashiba agi, taoba ita 22 nung Iraq mitkar züngsema nisung 8,000 shi tongpang balala nung asüba osang bushiteta lir.
Tan sangoktsüba nisung asür rong nung nisung 2,855 shi yaküm May ita nungi October ita tsüngda asüba osang bushitetogo.
Yaküm October ita nungi tenzüka tanü tashi nung Iraq nung nisung 1000 shi asüba osang ka UN Mission in Iraq (UNMI)-ia metetdaktsüogo.
“Iraq mitkartemi tongpang aika akoktsü tenzük aka, IS teloki tai maketba nisung jenti maneni tepseta parnok nem timtem toushi tia bener arutsüba osang bushiteta lir,” ta shia, Iraq nung tongpang rarabaren anenja tensa tajungba kümdaktsütsü asoshi alima linük ajungai Iraq sorkar nungita yaritsü tayongzükba ka UN’er Iraq envoy, Jan Kubis-ia metetdaktsüogo.
Alima linüktemi Iraq mitkartemi IS ket nungi tanaben agishiba tesemtem nung tang talidak meli alir Iraq nüburtem asoshi talitsü ki renemja Iraq sorkar den yariteptettsü ta pai shisem.
Ano külen, IS züngsemtemi nüburtem par jung kümdaktsütsü nükjidong nung nüburtem aliba tesemtem nung par tesep tentetba osang bushiteta lir ta UN-isa metetdaktsüogo.