Iraq tsür, Yanar Mohammed-i Rafto Prize agizükogo

Oslo, September 29 (Agencies): Nübur temeten atema tasü ita nokdaker, Iraq tsür, Yanar Mohammed nem meimchir temeten atema nokdakba sempet, Rafto Prize Norway soutwest tsütsü Bergen yimti nung tanü, Brehostibar nü agütsüogo.

Tongpang kanga sashia raradak, Iraq nung tetsür aser nütsüng yongsük ajema alir kin nung züngsemertem anema ozüng alema inyakba anema nokdakba nüngtem nung Yanar nem tan nungtugu sempetji agütsü.

Osangbener aser democracy inyakyim nung tetsür temeten atema nokdaker, arishi küm 55 tain Yanar ya Organization of Women’s Freedom in Iraq (OWFI) tenteter ka lir aser par tenteti lendong ajurushir tetsür jenti taküm kümzüka anitetba osang jangjaogo.

“Tetsürtem tashiyim agi taküm raksatsübaji tongpang raraba shilem ka aiben akümer aser Iraq ya yimtenren aser mitkar alizüng ajangzüktsü nükjidong nung tetsür aser par temeten ajemrepba linük ka lir,” ta Rafto Foundation ketdangser kati metetdaktsü.

“Iraq nung tetsürtem tashiyim agi raksatsüba aser parnok tekep yokdaktsüba densema, tetsürtem anema ozüng alema kanga sashia inyakba kuli ngua lir,” ta ketdangsersangi ashi.

Iraq nung tesep tentetba kiralongrar telok tetsüti, Islamic State (IS) züngsemtemi dang masü saka IS densema, kiralongrartem balala den rarar Iraq aser alima teloktep mitkartemia tetsürtem anema ozüng alema inyakba osang jenti bushiteta lir.

Norway nunger otsümeteter aser meimchir temeten atema nokdaker, Thorolf Rafto nüngtem nung agütsüba Rafto Prize taoba mapang agizüker nisung 4 tashi Nobel Peace Prize agizüka lir aser parnokji Aung San Suu Kyi, Jose Ramos-Horta, Kim Dae-Jung aser Shirin Ebadi nunger lir.

Norway nungsa kümshi agütsüba Nobel Peace Prize 2017 agizüktsüpur nisung tarensen taruba October ita 7 nü alima dang sangdongtsü renema lir.