Iraq’er Sinjar jila anogo ishika tsüngda nung agitsü: Kerry

Tunis, November 13 (Agencies): Iraq aser Syria na nung lendong kanga sashia atalokdaktsüba kiralongrar telok, Islamic State (IS)-i tashiyim agi agiba Iraq’er Sinjar jila anogo ishika tsüngda nung tanaben agitsü tamang akaba olen ka US Secretary of State, John Kerry-i tanü Hokolbar nü metetdaktsüogo.

US mitkartemi par tayimtsü amshia IS teseptem nung bomb tsükdakja amakba den külemi, Kurd nunger peshmerga mitkar teloktemi Iraq mitkar den yaritepba ajanga parnoki Sinjar jila anogo ishika tsüngda nung agitsü imlatsü tenzüka lir.

IS telok madak takok ngua tongpang raratsüsa Iraq anüdoklentip tsütsü tentetba Sinjar jila lungbanga tongpang raratsü renemshiba osang ka Kurd mitkar lenirtemia metetdaktsüogo.

“IS teloki tongpang raratsü terenemshiba tulu agia lir. Ajisüaka, ozü US aser Kurd mitkartemi yaria, Iraq mitkartemi Sinjar jila tarutsü anogo ishika tsüngda nung IS ket nungi tanaben agitsü tamang akar,” ta tang Tunisia linük semdanga alisang, Kerry-i nenshia ashi.

Ano külen, IS teloki tashiyim agi apuba US aser Britain sensottem tepsetba video nung shilem agir Britain senso, Mohammed Emwazi tepsettsü nükjidong nung US mitkartemi par tayimtsü amshia IS tespettem yashi, Brehostibar nü amakba osanga jangjaogo.