IRCS, Mokokchung-i Yaongyimti (New) nung angati medical camp ka katsü

Mokokchung, April 16 (TYO): April 15, 2016 nü Indian Red Cross Society (IRCS), Mokochung Branch aser yaritsü mulungertemi Yaongyimti (New) yimtak angati medical camp ka katsü aser iba mapang yimtak alirtem parnok nisung 200 dak tema nem mozü angati lemtsüba den temang angati tendangja liasü, ta IRCS, Mokokchung sangdong ka ajanga metetdaktsü.
Iba angati medical camp sentong ya Dr Supongmeren lenisüba nung Dr Takosunep, Dr Rachel, Dr Asen aser Dr Ayangla Saku nungeri katsü.
Doctor temi angati lemtsüba mozütemji IRCS Mokokchung, Nagaland-i agütsüba lir.
“Medical camp rongnung tan camp nung takok tuluba ngua inyaktetogo. Nübur aikati arua shilem agiba atema ni kanga pelar,” ta Indian Red Cross Society nung Honorary Secretary Dr Takosunep-i ashi.
Yimtsüng asoshi bilema iba camp katsüba atema Yaongyimti nungeri doctor tem aser teyaritepertem dang pelaba lemsatepogo.
Sungkomen ward Mokokchung nungi Imonen Jamir-i anir iba sentong nung yaritep aser parnoki medemer tsüngda senotzü tera saruteper Yaongyimti (New) village council, Yaongyimti (N) Baptist Arogo aser Yaongyimti (N) CYE teloktem nem tenla agütsü, ta kasa sangdong ajanga metetdaktsü.