IRCSN 31buba lokti senden kaogo

Kohima, August 19 (TYO): Indian Red Cross Society, Nagaland State Branch (IRCSN) 31buba lokti senden August 19, 2017 nü Durbar Hall, Raj Bhavan, Kohima nung ayonga kaogo.
Lokti pelaa agizükba o jembidang IRCSN Managing Committee züngsem, Dr. Neiphi Kire-i, alima tesem balala nung Red Cross-i melungteta mapa tajung mezüngdangteti inyakogo, ta metetdaktsü.
Red Cross indang mission ji taküm kümzüktsü, alima lendong balala ajema kümdaktsütsü, teyari mapa balala agütsütsü aser yimjung ajungkettsütsü lir, ta paisa ashi.
Paisa, “Nagaland ya seismic belt kübok Red Zone nung lir, aser yangi menoknok anoktsü amokmeren lir, iba den külemi alima tatsükba akümba ajanga ajungben lendong balaka ataloktsüsa lir, anungji asenoki asenok dak aliba tashi aser tashimait asadangtsüla aser item ama lendong atalokdang kati ka yariteptsüla,” ta ayongzük.
Sentong nungsa General Secretary, IRCSN, Dr. Kepelhusie Terhuja-i Business Session zünga metetdaktsüba den külemi August 18, 2017 senden amenba indang zünga metetdaktsü.
Nagaland Angh aser IRCSN Tir, P. B. Acharya-ia branches, centres aser nijatemi meranga nendaka inyakba atema pelaba metetdaktsü.
Angh-isa, Nagaland nung Red Cross Society-i nisung taliba ayimjemtsü aser iba telok nung lanur tali ayongdena züngsemtsü ayongzük.
Nagaland Chief Minister aser Vice-Chairman, IRCSN, T. R. Zeliang-ia, state tesem ajaklen IRCSN-i lokti tenzükba mapa aser temeim mapa balala inyakba atema pelaba metetdaktsü; item mapa rongnung shiranger nem rongdak ambulance agütsüba, medical aser azü tenlaba camp ayongzüka katsüba aser mi lendong nung takoksa angur nem teyari agütsüba densema lir.
T. R. Zeliang-isa, temelungertemi tenla agütsütsü aser Patrons, züngsemtem aser temeimertemi maneni melungsoa nüngdakbapurtem atema teyari agütsütsü asoshi district ajak nung ajungmesoa inyakdar, ta ashi.
Iba sentong ya Vice-Chairman, Dr. S. I. Tushi Ao leniba nung agi aser paisa tepela anküp o jembia liasü. Sentong nungsa Sanctuary Choir, Union Baptist Church, Kohima-i ken ka ajanga shilem agi .