Ireland Ato Kelonser asütsü India-origin, Leo Varadkar shim

Dublin, June 04 (Agencies): Hokulbarnü Ireland nung Ato Kelonser atema election agiba nung Fine Gael telok nungi Leo Varadkar-i takok angu.
Arishi küm 38 tain, Varadkar ya Ireland indang Ato Kelonser tanubutisang asütsü aser pai vote shilem 60 angu aser pa den tokteper Simon Coveney-i vote shilem 40 angu.
Iba menden asoshi Varadkar shimba ajanga Ireland nung akhi mapang nungi amshia aruba yimsü melenshiogo, kechiyong pa tebu ya India nunger doctor ka lir.
Party züngsem, local representative aser parliament züngsem temi vote agütsüba nung Varadkar-i takok nguaka popular vote bo Coveney-i timba ngutet.
June 12 nung Ireland indang parliament sentepba mapang pa indang nomination ya agizüktsü.
Varadkar-i Enda Kenny melentsü. Kenny ya iba telok nung küm 15 tashi tekolak süa aru.
Party indang electoral college system nung parliamentary party züngsem indang vote shilem 65, councillor indang vote shilem 10 aser ordinary züngsem indang vote shilem 25 lir.
Parliamentary party züngsem 73 nungi züngsem 51-i Varadkar nem vote agütsü.
Leo Varadkar ya tebur o tebur kasa shi nung medemer (gay) lir aser oa dak iba yimya aliba ya Ireland nung nübur ajungai meteta lir.
Varadkar ya 1979, January 18 nung aso. Pa tebu ya Mumbai nungi doctor ka lir aser tetsü ya Ireland tsür nurse ka lir.
Varadkar aser teyi ana ya Dublin nung soa intet aser Trinity College, Dublin nung medicine azüng.
Varadkar ya doctor ka lir saka pa arishi küm 30 majungdang councillor aküm aser pa parliament nung 2007 küm elect asüba sülen yimden yimsüsüba nung bendanga agüja inyak.
Varadkar ya tang Ireland parliament nung Social Protection minister menden bena lir aser pai cabinet menden aika nung inyakdanga lir.