Ireland nung PM Modi-i linük opposition party aitsü

Dublin, September 23 (Agencies): Ato kilonser Narendra Modi ghonda pongu agia tayimtsü ajanga Ireland atongba sülen Dublin nung India sensotem den jembidang linük nung opposition party aitsüogo.
Taoba mapang India lenirtemi Ireland mesemdangba dak sentakba nung India nung opposition aija Modi-i, “Kodang nisungtemi Delhi nungi New York-i odir, parnoki iba (Ireland) lenmang süia ayimer. Ajisüaka nenoki ni meimba ajanga anüng nungi ni atsüzükogo,” ta ashi.
Paisa, Ireland nüjiso ngur küm 100 ajungba benjungmung 2016 küm amungdang India-ia benjung amungtsü, ta ashi.
“Yangi aliba Irish chirtemi ni agizüktsü atema Sanskrit Shlokas aten. India nungbo, iba ya ajanga secularism nung tasüngdangba akatsü liasü,” ta Ato kilonser Modi-i ashi.
Modi-i, “Küm 60 tsüngda India Ato kilonser kati tang mezüng Ireland semdanger. Ni tatok meshia tenzüker. Ni nenok den mapang talangka intoktsü ta ang süner. Iba ya tetenzükba tajung ka. Taruba nungbo Ato kilonser kati Ireland semdangtsü atema küm 60 magitsü,” ta ashi.
Modi-i Ireland Ato kilonser Enda Kenny ajuruba sülen osangbenertem senden nung jembidang pai, “Kiralongraba densema alima linüktemi ajuruba tayongzükbatem aser Europe aser Asia na tensa nung tebilemba lemsatepba atema ni pelar,” ta ashi.
Paisa, United Nations Security Council nung India züngsem akümtsü atema Ireland dang pusemtsü teyari meshiogo, iba den külemi Nuclear Suppliers Group (NSG) densema International export nung amalitep atema jembiogo, ta ashi.
Modi-i Ireland semdangba ya anogo trok nü US semdangba mapang anenzükba ka liasü. Ato kilonser Modi Dublin nungi New York-i aotsü aser UN General Assembly senden nung adentsü, iba den külemi US Tir Barack Obama-i ayongba peacekeeping senden densema senden aika nung shilem agitsü.
Honibar nü pa West Coast-i aotsü aser yangji Silicon Valley nung India sensotem den jembitsü aser tatemsa Facebook aser Google headquarters semdangtsü.