Ireland tsür tepsetba ken o nung Vikas 7 nü police nem agutsü

Panaji, March 16 (Agencies): Goa nung aliba Canacona court-i, Ireland tsür ka tepsetba ken o nung tai tonglokja alisang, Vikas Bhagat police ket nung anogo tenetnü atema agutsüogo.
Arishi küm 25, Ireland tsür, Danielle McLaughlin ji South Goa nung aliba tzüyimküm ka nung sür lia angu; la tejak tepsatsür mangsa lia tasümangji angu, aser iba ken o nung police-i nisung ka pua lir.
Osang ka ajanga Police dang ashiba agi, Hombarnü tetsürlaji Bhagat den külemi angu.
Police-isa ashiba agi, tetsürlaji la medemer UK tsür ka den India-i aru, aser North Goa nung aliba Arambol nung amungba sülen Canacona yimi arua yimdak aliba tzüyimküm nung Holi benjung munga liasü, iba sülen Mongolbarnü la tasümang angu.
Vikas Bhagat ya Canacona yim nung lir, aser tamalena pa anema ken o aika lir. Pa apuba sülen pa dang asüngdangyaogo, ta police-i ashi.
Police-i Indian Penal Code (IPC) Section 302 kübok ken o ka benokba sülen Bhagat pua liasü.
Police-i, la dak tashiyim mapa tajung inyak südi, ta melung malemer. La tasümangji post-mortem agitsü atema Panaji anasa aliba Goa Medical College-i bener ogo.
1994 küm nunga Goa nung bendanger ana tepseta liasü aser küm ana atejaklena Canacona nungsa tetsür ka tepseta liasü.