Irom Sharmila-i Ibobi den tokteptsü party tasen ka tentetogo

Guwahati, October 18 (Agencies) : Meimchir temeten atema bendanga agüja inyakla, Irom Sharmila-i Mongulbarnü Imphal nung political party tasen, ‘People Resurgence & Justice Alliance’ tentetogo.
Sharmila-i, 2017 assembly election nung Thoubal constituency nungi State Chief Minister Okram Ibobi Singh den ni tokteptsü, ta sangdongogo.
Party tasenba nungi candidate 20-i shilem agitettsü aser tang tashi nung candidate pezüi iba party nungi tokteptsü osang jangjaogo.
Armed Forces (Special Powers) Act (AFSPA) agienang ta takhangba agüja küm 16 lumila, Sharmila-i tawa la lumiba anen. Lai lar constituency Khurai nungia tokteptsü ta metetdaktsüogo.
Sharmila-i, “AFSPA anema raratsü asoshi ni Chief Minister kümner. Ibobi-i nüburtem bilemba aiben tongtsüogo anungji ni Thoubal constituency nung madoktsü akok. Ajisüaka ni district tanga aser tenemlen aliba nüburtem junga repranger mereprangar metetner,” ta ashi.
Lai Imphal nung Johnstone Higher Secondary School semdangba ajanga nüburtem mulung nettsüogo.
Manipur nung mezüng election ji October 18, 1948 küm school ka nung agi liasü.