Irom Sharmila-i lumiba anentsü memelunger

Imphal, March 10 (Agencies): Manipur nungi Armed Forces (Special Powers) Act, 1958 agientsü atema takhangba agüja 2000 November 4 nü nungi lumila, Irom Sharmila dang state Social Welfare Minister, Akoijam Miraba-i la lumiba anentsü mepishia liasü, ajisüaka lai ibaji magizük.
Tawa Mirabai-i Sharmla dang, state sorkari AFSPA agientsü atema mepishibaji Centre-i mangar, ta ashiba ajanga tang Manipur nung Congress sorkar aitsür.
International Women`s Day anogomung, March 8 nü tetsür MLA ana- Mirabai aser Chief Minister, Okram Ibobi kinüngtsü, Okram Landhoni nati J.N. Institute of Medical Sciences, Imphal nung Sharmila ajurua liasü aser iba mapang nung Sharmila-i lenir ana dang, lai tamakoktsü ka akhanger asü (?) ta asüngdanga liasü.
Lai lenir ana dang, “Ni tamakoktsü ka asüngdanger asü(?) Lokti tesünep nung alitsü atema tetsürtemi agiba shilemji ajaki temetet dang. Ni küm 16 tashi lumiaka state sorkari mangu ama toktsür aser iba ya tejashitsüka lir. Tripura state-ibo AFSPA ya mapang mashika nung agientettsü ta kuli sayuogo,” ta Sharmila ashi.
Mirabai-i la mesüzüktsü meranga, “AFSPA ji Centre sorkari dang agientettsü. State sorkari maneni Centre dang iba ya agientsü mepishir. Anungji nai lumia lungkak aitba anentsüla aser asenoki maneni takhangba agütsütsüla,” ta ashi.
Minister-i jembiba o ajanga nisung aika süngmangogo aser aikati, minister-i tzüzüng ozüng junga meteta mali asü ta tasüngdangba akar.
Tripura nungbo küm 18 tashi Armed Forces Special Powers Act (AFSPA) aliba sülen yaküm May 29 nü state sorkari iba Act agientsü lemteta liasü.