Irom Sharmila-i nomination file asütsü atema bicycle nung kilometer 20 ao

Imphal, February 17 (Agencies): Sharmila ya tanga yimtenren lenirtem ama sen tasak jenjang gari aser nisungi meketbanger senzüba nisung ka masü.
Meimchir temeten nungi yimtenren nung ajemokla, Irom Sharmila Chanu dang ‘Iron Lady of Manipur’ taka ajar, lai mapa aika tangar dang nungi balaka inyaker.
Tawa taruba election nung nomination file asütsü asoshia Irom-i lar ki Imphal nungi kilometer 20 bicycle agi aotsü asoshi molungtet.
Irom-i yaküm People’s Resurgence and Justice Alliance party tentet. La Thoubal constituency nungi nomination file süogo.
“PRJA nungi Irom Sharmila-i la Thoubal constituency menden asoshi Chief Minister, Okram Ibobi den tokteptsü asoshi nomination file asütsü atema bicycle ka anir ao,” ta Hokolbarnü osang ka ajanga metetdaktsü.
Irom election nung Congress lenir aser küm asem tashi Manipur chief minister inyaksang Okram Ibobi Singh den tokteptsü. La nüboyimba sentong nung senzüba aika nung anü aser auyi nungi kümzüktsü asoshi korang ka semer bicycle nung senzüba nguogo.
Tawa Bharatiya Janata Party-i la nem par party nungi tokteptsü asoshi sen crore 36 agütsütsü nangzük, ta lai jungkai adokdaktsüba ajanga mepetmesü adoka liasü.
Irom-i Manipur nungi Armed Forces Special Power act (AFSPA) agientsü takhangba aguja küm 16 lumiba sülen yaküm nungi yimtenren nung dena shilem agir.
Manipur assembly menden 60 atema shilem ana küma lemsar election agitsü. Mezüngbuba shilem March 4 nung aser tanabuba March 8nü ta agitsü.
Taoba election nung Congress Party-i menden 42 nung takok ngua Ibobi Singh maneni chief minister menden nung shimshi.