Irom Sharmila-i Thoubal nung Ibobi Singh den tokteptsü asoshi la tanendak mesemogo

Imphal, January 08 (Agencies): Honibarnü Irom Sharmila Chanu-i la Chief minister, Okram Ibobi Singh den taruba election nung tokteptsü asoshi renemshiba nung jenjang tasen ka agia, Thoubal, Ibobi Singh’er yimdak la alitsü asoshi para ki ka mesemogo.
People’s Resurgence aser Justice Alliance (PRJA) telok koba dang tasen tenteta lir, iba nung Co-convener, Sharmila-i cycle nung Thoubal-i orr la alitsüba takdang ka mesemtet.
“Ni tanü Thoubal Wangmataba, chief minister’err yimtak takdang ka, khen alitsü asoshi mesemogo. Iba ki ya Thoubal nung PRJA- pur office asütsü. Ni iba kidang yagi anogo ishika tsüngda aitsü,” ta Sharmila-i osangbenertem dang ashi.
“Iba tesem nung amenloker külen Thoubal nung party nung inyakertem aser pusemertem den külemi nüboyimba sentong tenzüktsü, ta ‘Iron Lady of Manipur’-i shisem.
Laisa ashiba agi iba tesem nung lai nüboyim tenzükogo.
Manipur nung iba Election ya anaben lemdanger agitsü. March 4 nungi menden 38 asoshi tokteptsü, aser March 8 nung tanüngba menden 22 asoshi tokteptsü. Item rongnung menden 11 tenem lima nung alitsü, aser Thoubal tena tanüngbatem mendenji lenden nung alitsü.
Chief minister-i anir par teloki küm 15 yimsü asüba mapang, Manipur nung Armed Forces (Special Powers) Act (AFSPA) magientetba atema iba tejashi nung lai Ibobi Singh den tokteptsü melungtet.
Iba military act anema lai küm 16 lümia longkak aitba sülen yaküm August 7 nung tembangba sülen, la election nung tokteptsü ta lai sangdong.
PRJA convener Erendro Leichombam (33), shiba West Imphal, Thangmeiband constituency nungi tokteptsü ali, pai ashiba agi par party nungi nisung tenetibosa tokteptsü bilemdar, aser nisung pungobo jangjaogo aser nüboyim sentong tenzükogo. Parnok nüboyimba sentong nung tekülemba ki balala sema jajar, yimtak yimtsüngtem aser district tem, lanur aser shisashirtem den lokti sensaksem sentong balala agidar.
10buba Guru Gobind Singh 350 buba tasoba anogo amongba tenüng nung Brehostibarnü PRJA züngsemtem Erendro aser Sharmila-i anir Imphal nung Thangal Bazar, Thangmeiband constituency kübok aliba Gurudwara Sahib semdang.