Irom Sharmila taküm otsü film atema Taapsee dang asüngdang

Mumbai, September 07 (Agencies): Manipur nungi meimchir temeten atema inyaker, Irom Sharmila taküm otsü film nung la shilem agitsü atema la dang asüngdang, ta actress Taapsee Pannu-i metetdaktsü.
Lai iba film atema tezüngzüktep agiogo ta osangtem liasü, ajisüaka laibo, ‘ni ao film otsüji mezüngdang’ ta shiogo.
Interview ka nung Pannu-i, “Kü dang asüngdangogo, saka ni oa ostüji angadangtsü atema mapang asadangdar, kechiyong item mapa (film ajungkettsüba) nung mazüngi lir. ‘Pink’ film kodang sayadir, ni angadangtsü aser bilemdangtsü,” ta ashi.
Manipur nung ‘Iron Lady’ ta ajala, Irom Sharmila-i küm 16 tashi lumia Armed Forces Special Powers Act (AFSPA) ozüng aginetsü takahgnba agüja aruba sülen taoba ita lai lumiba tembangogo. Irom-i AFSPA agientsü atema la chief minister kümner, ta sangdongogo.
Arishi küm 44 Sharmila lumia aruba mapang la taküm alitsü atema sorkar hospital ka nung teni ajanga la nem chiyungtsü agüja liasü.
La lumiba anentsü t alai magistrate dang nangzükba süken Imphal nung court kati la anema ken o benoka aliba-a agienogo.
Taapsee-isa, Irom Sharmila indang shilem agitsüji khuret tulu, kechiyong aikati la aitsütsü akok, ta ashi.
“Lenmang aisülen nungi iba ya khuret tulu. Ni aika shisadangtsü nüngdak. Ni iba shilem agira ni aitsütsü akok, aser ni ibaji maginer. Ni bilemdangtsü jenti lir. Anungji reprangdangdi,” ta arishi küm 29 actress-isa ashi.
Kobi melii Taapsee indang film “Pink” sayatsü, iba film nung megastar, Amitabh Bachchan-ia shilem agia lir.
Aniruddha Roy Chowdhury-i direct asüba aser Rashmi Sharma o Shoojit Sircar nati produce asüba film ‘Pink’ ya September 16 nü sayatsü.